Elordanyń Kóktal-1 shaǵyn aýdanyndaǵy úıler mamyrdan bastap gazǵa qosylady
Halyqpen búgin onlaın kezdesý ótkizgen Nur-Sultan qalasy Saryarqa aýdanynyń ákimi Eset Baıken elordadaǵy jer úıler kóbirek shoǵyrlanǵan Kóktal 1, Kóktal-2, Agroqalashyq yqsham aýdandaryna gaz qosý máselesine jeke toqtaldy.
«Búgingi tańda «Astana» №1 avtomattandyrylǵan gaz taratýshy stansasynyń bólýshi ornynan «Kóktal» gaz retteýshi beketine deıin 9200 metrlik bolat qubyr tartyldy. «Kóktal» gaz taratýshy beketinen GTB-1, GTB-2, GTB-3-ke deıin qysymy D=500 bolatyn 8000 metrlik polıetılendi qubyr tartyldy. Gaz taratýshy beketter ornatyldy. Kóktal-2 yqsham aýdany týraly aıtar bolsaq, 50 mekenjaıǵa gaz qosylyp qoıdy. Al Kóktal-1 yqsham aýdanyndaǵy 91 kósheniń 88-i boıynsha jumys aıaqtaldy. Atalǵan turǵyn úı alabyndaǵy úılerge merdigerler gazdy osy jyldyń mamyr aıynda qosýdy josparlap otyr», - dedi Eset Baıken onlaın kezdesý barysynda.
Al Agroqalashyqtaǵy 97 kósheniń 65-ne gaz qubyry tartylǵan. Turǵyn úı alabynyń ortalyǵyndaǵy 24 kóshedegi úılerdi 2021 jyldyń sońyna deıin gazǵa qosý josparlanyp otyr.
Sonymen qatar atalǵan úsh yqsham aýdanda 14 áleýmettik nysanǵa gaz qosylmaq. Olardyń ishinde – 7-ýi Kóktal-1, 2-ýi Kóktal-2, 5-ýi Agroqalashyqtaǵy bilim berý nysandary.
Eske sala ketsek Úkimettiń keńeıtilgen otyrysynda Memleket basshysy Qasym-Jomart Toqaev Nur-Sultan qalasynyń ákimi Altaı Kólginovten gazdandyrý máselesi qalaı júrgizilip jatqanyn suraǵan bolatyn. Atap aıtqanda Prezıdent qala ákiminen jer úılerge gaz qosý qyzmeti nelikten qymbat ekenin bilgisi kelgen edi.
Foto: Aleksandr Kýprıenko