Elordanyń qoǵamdyq kólikterinde maska rejıminiń saqtalýy tekserildi
NUR-SULTAN. QazAqparat - Elordada KVI indetiniń ósýine baılanysty qoǵamdyq kólikte maska rejıminiń saqtalý barysy tekserildi, dep habarlaıdy QazAqparat qala ákimdigine silteme jasap.
CTS kólik kompanııasynyń mamandary avtobýstarǵa kirip, jolaýshylardyń betperde rejımin saqtaýyn qadaǵalady. Tekserýshiler maskasyn sheship otyrǵandarǵa jáne ony durys taqpaǵandarǵa eskertý jasap, elordadaǵy epıdemıologııalyq jaǵdaı men koronavırýs indetiniń ósýine baılanysty maska rejımin saqtaýdy surady.
«Qazir reıdke jıi shyǵamyz. Ózderińiz bilesizder, karantınge baılanysty qoǵamdyq kólikke kirgen jolaýshylar mindetti túrde betperde erejesin saqtaýy kerek. Biraq keıbir jolaýshylar maska taqpaı kiredi. Sol sebepti avtobýsta júrgen kezde «betperde taǵyńyzdar» dep eskertemiz. Qazir maskaǵa qatysty jaı ǵana eskertý jasap júrmiz. Aıyppul salynyp jatqan joq. Jolaýshylardyń teń jartysy betperde taqsa, jartysy maskasyz nemese durys taqpaı otyrady. Al bizdi kóre sala jyldam taǵyp ala qoıady. Qazir qoǵamdyq kólikte dezınfektsııa júrgizilip turady. Degenmen maska taǵý aýrý juqtyrý qaýpin azaıtady. Adam kóp jınalatyn jerde barynsha qaýipsizdik saqtaǵan abzal», – dedi CTS kompanııasy kólik baqylaý departamentiniń menedjeri Altynaı Álishbekova.
Esterińizge sala keteıik, elordadaǵy epıdemıologııalyq ahýal óte aýyr bolyp tur. Kún saıyn qalada KVI aýrýyn juqtyrǵan 1 300-den astam naýqas anyqtalady. Aýrýdyń ortasha jáne aýyr aǵymy bar 300-ge jýyq patsıent ınfektsııalyq statsıonarlarǵa túsedi. Osyǵan baılanysty mamandar qalasy turǵyndaryna ara qashyqty saqtap, betperde taǵý erejesin qatań saqtaýdy suraıdy.
Aıta ketý kerek, ınfektsııanyń ósýin toqtatýdyń jalǵyz tıimdi ádisi – ekpe egý arqyly ujymdyq ımmýnıtetti qalyptastyrý. Ol úshin vaktsınany turǵyndardyń 60%-dan astamy alýy tıis.
