Elordanyń qoǵamdyq kólikterinde dezınfektsııa júrgizildi

NUR-SULTAN. QazAqparat - Elordada qoǵam kólik júrgizýshileri kún saıyn aýysymynan keıin avtobýsyna dezınfektsııa jasaıdy. Tutqa men oryndyq, esik, valıdator jáne jolaýshylar ustaıtyn jerler súrtiledi, dep habarlaıdy QazAqparat qala ákimdigine silteme jasap.

Vırýstyń taralýynyń aldyn alý úshin avtobýs salony jeldetiledi

Al jeksenbi kúni qoǵamdyq kóliktiń jumysy toqtatylady. Avtobýstar men avtoparkterde arnaıy zalalsyzdandyratyn eritindimen aýqymdy dezınfektsııa jumysy júrgiziledi.

«Kún saıyn óz aýysymynan keıin ár avtobýs kásiporyn aýmaǵyndaǵy jýý ornyna kirgiziledi. Qazirgi ýaqytta kólik jýylatyn eki oryn bar. Aldymen syrty jýylady, sodan keıin baryp avtobýs ishi dezınfektsııalanady. Dezınfektsııa kún saıyn, túrli eritindiler qosylyp jasalady. Bul eritindi emhanalarda, aýrýhanalarda, mektepke deıingi mekemelerde, mektepterde, sol sııaqty qoǵamdyq kólikterde qoldanylady», — deıdi №1 avtobýs parkiniń bas ınjeneri Baýytjan Tileýbergen.

Turǵyndardy koronavırýstan saqtaý úshin avtobýs salondarynda antıseptık ornatylǵan. Kólik júrgizýshileri men qyzmetkerleri jeke qorǵanys quralyn taǵyp júredi.

Eske sala keteıik, elordadaǵy qoǵamdyq kólikte jolaýshylar mindetti túrde betperde taǵýy kerek.