Elordanyń qoǵamdyq kólikteri 6 jylda 78%-ǵa jańartyldy
NUR-SULTAN. QazAqparat – City Transportation Systems kólik kompanııasynyń baspasóz qyzmeti elordada qoǵamdyq kólik jumysyn jaqsartý jumystary týraly aıtyp berdi, dep habarlaıdy QazAqparat.
«2021 jyldyń qorytyndysy boıynsha qoǵamdyq kólik jumysyn jaqsartý úshin birqatar jumys júrgizildi: 6 jańa marshrýt (26, 30, 43, 45, 69, 323) iske qosyldy, 20 marshrýttyń qozǵalys syzbasy ózgertildi jáne jelidegi avtobýstar sany 806-dan 886 danaǵa deıin kóbeıdi. Qosshy qalasy jáne «Lesnaıa polıana» t/a aýdanyna 302, 303, 320, 323 marshrýttary qyzmet kórsetedi. 2021 jyly osy baǵyttaǵy marshrýttardyń júktemesin azaıtý úshin 323 marshrýt iske qosyldy. Aldaǵy ýaqytta avtobýstar men júrgizýshilerdiń tapshylyǵyna baılanysty jańa baǵyttardy odan ári iske qosý josparlanyp otyrǵan joq», - dep túsindirdi kompanııanyń baspasóz qyzmeti.
Elordanyń jyljymaly quramynda myńnan astam avtobýs bar, 2015 jyldan bastap olardyń 78%-y jańartyldy. Mysaly, 2019-2020 jyldary 100 jańa avtobýs – elektrobýs shyǵaryldy. Aldaǵy ýaqytta taǵy 100 elektr avtobýsyn qoldanysqa berý josparlanýda. Elordada qoǵamdyq kólik jelisi 95 marshrýttan turady, onyń ishinde 70 qalalyq jáne 25 qala mańyndaǵy qatynas bar.
2021 jyly avtobýstar sany 10%-ǵa nemese 806-dan 886-ǵa deıin kóbeıgen. Bul baǵyttaǵy jumys jalǵasatyn bolady. 2021 jyly 6 jańa marshrýt iske qosyldy, sondaı-aq 20 marshrýttyń shemasy jaqsartyldy, 31 kóshe men 18 aýdanda problemalyq ýchaskelerdiń kólikke qoljetimdigi boıynsha máseleler sheshildi jáne 9 marshrýttaǵy jyljymaly quram jańartyldy.
