Elordanyń kishkentaı hokkeıshileri el birinshiliginde jeńimpaz atandy
ASTANA. 21 qarasha. QazAqparat - Elordada eń kishkentaı hokkeı oıynshylary Qazaqstan chempıonatynyń birinshi týryn ótkizdi, jarys 20 qarashada aıaqtaldy. Bul olardyń alǵashqy el birinshiligi, onda barlyq komandalar joǵary deńgeıde óner kórsetti.
Bul týraly astana.kz saıtyna Týrızm, dene shynyqtyrý jáne sport basqarmasynan habarlady.
«Jarysta Astana, Qaraǵandy, Pavlodar, Ekibastuz, Óskemen, Rýdnyı jáne Almaty qalalarynan 8 hokkeı komandasy kúsh synasty. Birinshi týrda aıdyn ıeleri «Astana» komandasy kósh bastady», - delingen habarlamada.
Alty kezdesýdiń bárinde basym túsken Astana qalasynyń №10 Balalar jáne jasóspirimder sport mektebiniń komandasy týrdyń sońǵy oıynynda óskemendik «Torpedomen» baq talastyrdy. Qarsylastar týrnırlik keste boıynsha bir ǵana upaımen ese jibergen edi. Sondyqtan bul kezdesý tartysty ótti.
«Óskemendik hokkeı mektebi jaqsy, keńestik zamannan qalǵan dástúrlerge baı, - deıdi «Astana-2004» balalar komandasynyń aǵa bapkeri Asqar Maıjolov, - sondyqtan ol biz úshin myqty qarsylas boldy. Biz osy kezdesýdi kúttik, ári daıyndaldyq».
Elordalyq komandanyń sapyndaǵy 5 sportshy 2005 jyly, qalǵany 2004 jyly dúnıege kelgender.
Jarys qorytyndysy boıynsha, «Astana» komandasy (21 upaı) birinshi, «Torpedo» (17 upaı) ekinshi jáne taǵy da bir astanalyq «Barys» komandasy (14 upaı) úshinshi oryn aldy. Aldaǵy ýaqytta komandalar keler aptada ótetin kelesi týrǵa daıyndalady.
