Elordanyń keıbir kóshelerinde júk jáne mamandandyrylǵan kólikterdiń qozǵalysyna ýaqyttyq shekteý qoıylady
ASTANA. QazAqparat - 14 qyrkúıekten bastap Astananyń keıbir kóshelerinde júk jáne mamandandyrylǵan kólikterdiń qozǵalysyna ýaqyttyq shekteý qoıylady. Bul bastamany Jolaýshylar kóligi jáne avtomobıl joldary basqarmasy, Ákimshilik polıtsııa basqarmasy «Astana LRT» kompanııasymen birlesip júzege asyryp otyr, dep habarlaıdy elorda ákimdiginiń baspasóz qyzmeti.
Shekteý tańǵy saǵat 7.00-den keshki 21.00 deıin jalǵasady jáne 2 ýchaskeni qamtıdy.
№1 ýchaske. Bógenbaı batyr dańǵylynyń boıymen Aqjol kóshesinen Beısekova kóshesine deıingi aýmaq. Uzyndyǵy - 8,6 km. Balama jol retinde júk jáne mamandandyrylǵan kólikter Alash tas jolynyń boıymen, «Obhod Astana» dep atalatyn avtomobıl jolynyń Tilendıev kóshesinen Beısekova kóshesine deıingi jolmen júredi.
№2 ýchaske. Tórt úlken kósheni qamtıdy. Qoshqarbaev kóshesi (Tólebaev kóshesinen Sarykól kóshesine deıin), Baıtursynov kóshesi (Sarykól kóshesinen Obaǵan kóshesine deıin), Syǵanaq kóshesi (Táýelsizdik kóshesinen Turan kóshesine deıin) jáne Qabanbaı batyr dańǵyly (Syǵanaq kóshesinen Hýseın ben Talal kóshesine deıin). Balama jol retinde júk jáne mamandandyrylǵan kólikter Qaraǵandy tas joly arqyly Tólebaev kóshesinen Astana-Qaraǵandy jolaıyryǵy arqyly, odan keıin Qabanbaı batyr dańǵylynyń boıymen Qarqaraly tas jolymen qıylystaǵy aınalmaly jolaıyryqqa deıingi jolmen júre alady.
Júrgizilgen saraptamaǵa sáıkes, júk kóligi Bógenbaı batyr dańǵylyn qarbalas kezinde 21 km/saǵ jyldamdyqpen 24 mınýtta júrip ótedi. Balama jol arqyly júrgen jaǵdaıda, bul kórsetkish 7 mınýtqa artady. Alaıda kóliktiń jyldamdyǵy 60-63 km/saǵ. jetedi. Ekinshi joldyń boıymen júk kóligi qarbalas ýaqytta 28 km/saǵ jyldamdyqpen 28 mınýtta ótetin edi. Balama jolmen kóliktiń jyldamdyǵy 60-63 km/saǵ deıin artyp, 4 mınýtqa artyq ýaqyt alady.
Bul ózgerister kelesideı máselelerdi sheshýge septigin tıgizedi: atalǵan kóshelerdegi keptelis; ýchaskeler jalǵasatyn kóshelerge túsetin júkteme; qalanyń negizgi kóshelerindegi júk kóliginiń qarqyndy qozǵalysy; júkteme kóp túsetin kóshelerde qoǵamdyq kóliktiń kóp bolýy; kólik aǵymy jyldamdyǵynyń tómen bolýy, sonyń saldarynan qorshaǵan ortaǵa keltiriletin zalal.
Júk kóligin shekteý atalmysh kóshelerde qarbalas ýaqytta kólik aǵymy jyldamdyǵynyń artýyna ákeledi. Osylaısha, Bógenbaı batyr dańǵylynyń keı ýchaskelerinde jyldamdyq 4 km/saǵ, al Syǵanaq kóshesiniń boıynda kólik jyldamdyǵy 5 km/saǵ deıin artady.
