Elordanyń qaı aýmaǵynda aqyly avtoturaqtar paıda bolady
NUR-SULTAN. QazAqparat – «Astana turaq keńistigi» JShS dırektory Shyńǵys Dosybaev elordanyń qaı aýmaqtarynda aqyly avtoturaq paıda bolatynyn aıtyp berdi, dep habarlaıdy QazAqparat tilshisi.
Onyń sózine qaraǵanda, 2015-2016 jyldary qala ákimdigi kommýnaldyq aqyly turaqtar ornalasatyn jerlerdi aıqyndady. Bul rette aýmaqtyq ornalastyrý týraly sheshim kólik trafıgi júktemesi boıynsha taldaý málimetterine negizdeldi.
«Kólik júktemesi boıynsha osy málimetter negizinde elordanyń ákimshilik iskerlik ortalyqtary aıqyndaldy. Bul jerlerde trafık aǵynyn retteý tetigi retinde jáne turaq oryndaryndaǵy aınalymdy arttyrý úshin aqyly avtoturaqtardy engizý qajet», - dedi Sh. Dosybaev.
Onyń sózine qaraǵanda, atalǵan aýmaqtarǵa Syǵanaq-Saraıshyq, Máńgilik El-Turan dańǵyldary aralyǵy enip otyr.
«Bul aýmaqta ulttyq kompanııalardyń, iskerlik bıznes-ortalyqtardyń basym bóligi ornalasqandyqtan, jumys ýaqyty kezinde bos turǵan avtoturaqty tabý qıynǵa túsetini belgili. Bul óz kezeginde turǵyndarǵa jáne avtokólik ıelerine qolaısyzdyq týdyrady. Sebebi turaq izdegen júrgizýshiler sol aýmaqty kóligimen birneshe ret aınalyp shyǵýǵa májbúr bolady. Osy arqyly kóshedegi negizgi kólik trafıginiń baıaýlaýyna áser etedi», - dedi ol.
Sonymen qatar Sh. Dosybaev qalanyń oń jaǵalaýynda aqyly turaqtardy engizý jospary týraly aıtyp berdi.
«Oń jaǵalaýǵa toqtalsaq, Saryarqa aýdanynda aqyly avtoturaqtardy ornalastyrý boıynsha sheshim qabyldandy. Atap aıtqanda, Jaǵalaý mańy, Bógenbaı batyr, Saryarqa jáne Respýblıka dańǵyldary aýmaǵynda tıisti jerler belgilendi. Bul aýmaqta turaq oryndaryn uıymdastyrýdyń tapshylyǵy sezilýde», - dedi ol.
