Elordanyń kásipodaqtyq uıymdary eńbek jáne áleýmettik qorǵaý boıynsha óz mindetterin oryndap otyr - kásipodaqtar keńesiniń tóraǵasy
ASTANA. Qarashanyń 12-si. QazAqparat /Marlan Jıembaı/ - Búgin «Astana sý arnasy» memlekettik kommýnaldyq kásipornynda ótken semınar-keńeske qatysýshylar elordanyń kásiporyndaryndaǵy áleýmettik jáne eńbek qatynastarynyń saqtalý máselelerin talqylady,
dep habarlaıdy QazAqparat.
Uıymdastyrýshylardyń aıtýynsha, ótkizilgen is-sharanyń negizgi maqsaty - jumysshy men jumys berýshi arasyndaǵy teńdiktiń saqtalý prıntsıpteri, ujymdyq kelisimshart jasaý tártibi, eńbek qatynastaryn retteý.
Alqaly jıyn barysynda sóz alǵan Astana qalalyq kásipodaqtar keńesiniń tóraǵasy Sársenbaı Myńbaev «Biz jumysshylardyń konstıtýtsııalyq jáne eńbek quqyǵyn bilgendikterin qalaımyz. 90-shy jyldary kásipodaqtar elimizde oryn alǵan ózgeristerge oraı abyrjyp qalǵan edi. Al qazirgi ýaqytta olardyń qyzmeti úshin quqyqtyq negiz qalyptasyp otyr. Eńbek kodeksinde kásipodaqtardyń roli jumysshylardyń ókili retinde anyqtalǵan. Osyǵan oraı sońǵy jyldary respýblıkada kásipodaq qozǵalystarynyń qaıta jandaný úrdisi baıqalady», dedi.
Sonymen qatar ol alǵashqy kásipodaqtyq uıymdar qazirgi ýaqytta azamattardy eńbek jáne áleýmettik qorǵaý boıynsha óz mindetterin tolyǵymen oryndap otyrǵandyǵyn atap ótti. Onyń aıtýynsha, búgingi kúni elordada 300-ge jýyq úkimettik emes uıymdar jumys isteıdi. Onyń 70-i jastar problemalarymen, 20-sy áıelder máselesimen aınalyssa, 27-si quqyq qorǵaý qyzmetimen aınalysady eken.
«Qazirgi ýaqytta jumysshylar jumys berýshilerdiń is-áreketine baılanysty jıi shaǵymdanady. Osy oraıda biz týyndaǵan máselelerdi zańnama sheńberinde sheshýge tyrysamyz», dedi. S.Myńbaev.
