Elordanyń qarttar úıinde «Ardagerlerdi ardaqtaıyq» respýblıkalyq aktsııasy ótti
A. Qańtardyń 11-i. QazAqparat /Marlan Jıembaı/ - Búgin elordanyń Kóktal eldi-mekeninde ornalasqan «Astana qalasynyń qarttar jáne múgedekter úıi» memlekettik mekemesinde Uly Otan soǵysy jeńisiniń 65 jyldyǵyn atap ótý qarsańynda «Nur Otan» halyqtyq- demokratııalyq partııasynyń uıytqy bolýymen «Ardagerlerdi ardaqtaıyq» respýblıkalyq aktsııasy ótti.
«Bizdiń mekeme qazirgi tańda soǵys ardagerleri turatyn elimizdegi jalǵyz oryn. Sondaı-aq soǵys ardagerlerine teńestirilgen tyl eńbekkerleri, burynǵy Aqmola oblysynyń alǵashqy tyń ıgerýshileri turady. Soǵys barysyndaǵy áskerı is-qımyldar jaıynda jáne soǵystan keıingi qıraǵan kásiporyndardy qalpyna keltirý barysynda ter tókken azamattardyń jastar úshin aıtary mol», dedi óz sózinde mekemeniń dırektory Kenjebolat Bapıshev.
«Bizdiń jastarǵa aıtarymyz áli de bar. Búgingi is-shara jastar men qarttardyń kezdesýine arnalyp otyr. Óz ýaqytynda bizder de ardagerlermen kezdesý ótkizgen edik, olardyń arasynda Azamat soǵysynda Chapaevtyń qolastynda shaıqasqandar da boldy. Jalpy mundaı is-sharalar óz memleketteri olardy umyt qaldyrmaǵandyǵyn sezinýi úshin jasalady», deıdi Qarttar úıi ardagerler keńesiniń tóraǵasy Oleg Lınnık.
Respýblıkalyq aktsııa aıasynda ótken kezdesý barysynda qarttar jastar daıyndaǵan kontserttik baǵdarlamany tamashalady. Soǵys jáne tyl ardagerleri surapyl soǵys jyldarynda bastan keshken oqıǵalaryn sharaǵa qatysýshylarǵa aıtyp berdi. Іs-sharaǵa «Aýǵanstan soǵysy ardagerleri men múgedekteri odaǵy» qoǵamdyq birlestiginiń ókilderi, «Nur Otan» HDP «Jas Otan» jastar qanatynyń belsendileri, «Jas ulan» respýblıkalyq mektebiniń oqýshylary qatysty.
Búgin bastalǵan respýblıkalyq aktsııa mamyrdyń 9-yna deıin jalǵasady.
