Elordanyń karantın aımaǵyna ótip ketpek bolǵan kólik ózenniń ortasynda qalǵan
NUR-SULTAN. QazAqparat - Elordada karantın aımaǵyna zańsyz ótip ketpek bolǵan «Mercedes Benz Gelandewagen» kóligi Nura ózenniń ortasynda turyp qalǵan. Qalalyq departamenttiń izdeý-jedel toby kólikti taýyp, sýdan alyp shyqty, dep habarlaıdy QazAqparat elordalyq polıtsııa departamentiniń baspasóz qyzmetine silteme jasap.
Nur-Sultan qalasynda engizilgen tótenshe jaǵdaı kezinde karantın aımaǵyna zańsyz ótkenderdi anyqtaý jáne ustaý maqsatynda qalalyq polıtsııa departamentiniń tártip saqshylary jáne «Astananyń kólik klýbtary alıansy» qozǵalysynyń eriktilerinen qurylǵan mobıldik jedel-izdeý toptary quryldy.
6 sáýir kúni saǵat 11:00 shamasynda jedel top Tselınograd aýdanynyń Qosshy jáne Taıtóbe aýyldarynyń arasynda Nur-Sultan qalasynyń karantındik aımaǵyna Nura ózenin kesip ótpek bolǵan «Mercedes Benz Gelandewagen» kóligin anyqtady.
Alaıda, bóget shlıýzy ashylǵandyqtan ózendegi sý deńgeıi bir jarym metrge kóterilip, kólik sýdan óte almaı qalǵan.
Polıtseıler men eriktiler bolat arqanǵa jalǵap, kólikti sýdan súıretip alyp shyqty.
Karantın rejımin buzǵan er adam ózenge balyq aýlaýǵa kelip, osyndaı jaǵdaıǵa urynǵanyn aıtyp aqtalǵan.
«Mercedes Benz Gelandewagen» markaly kóliktiń júrgizýshisine qatysty QR Ákimshilik quqyq buzýshylyq kodeksiniń 476-baby («tótenshe jaǵdaı rejımin buzý») boıynsha hattama toltyryldy, Atalmysh bapta 10 AEK kóleminde aıyppul tóleý nemese 15 táýlikke deıin qamaýǵa alý qarastyrylǵan.
Polıtsııa departamenti kún jylynýyna baılanysty ózende sý deńgeıi kóterilip, keıbir kópirge shyǵar tusty jáne joldardy sý basyp qalǵanyn eske salady. Nur-Sultan qalasynyń turǵyndaryna asa saqtyq tanytyp, qajettilik týyndamasa, úıden shyqpaýǵa keńes berildi.
