Elordanyń Qabanbaı batyr kóshesi 8 jolaqty bolýy kerek – sáýletshi
NUR-SULTAN. QazAqparat –Sáýlet doktory, Qazaqstannyń qurmetti sáýletshisi Sársenbek Júnisov Ortalyq kommýnıkatsııalar qyzmetinde ótken «dóńgelek ústelde» astanadaǵy Qabanbaı batyr kóshesin keńeıtý jobasyn jalǵastyrý kerektigin aıtty, dep habarlaıdy QazAqparat tilshisi.
«2019 jyldan beri astanadaǵy Qabanbaı batyr kóshesin kúrdeli jóndeýdiń aýqymdy jobasy josparlanyp jatqany belgili. Syzbadan joba quny 92 mlrd teńge bolatyny anyqtalǵan. Biraq 2022 jyl bolsada, joba áli qolǵa alynbaı jatyr. Bul aralyqta quny qymbattap ta úlgerdi. Jobanyń taǵdyry ne bolady? Nege iske aspaı jatyr», - dep surady BAQ ókili dóńgelek ústel otyrysyna qatysýshy sáýletshilerden.
«Iá, Qabanbaı batyr kóshesin keńeıtý jobasy bolǵan. Onyń ishinde kósheni Esil ózeninen bastap áýejaıǵa deıin keńeıtip shyǵý josparlanǵan. Ol jobanyń ishine tsırktiń mańynan, Qorǵaljyń kóshesiniń tusynan, Turan kóshesi jaǵynda aıyryqtar salý sharalary da engizilgen. Jalpy alǵanda, kósheniń boıyna birneshe aıyryq salyný kerek edi. Aqparat taratýda qatelik ketti de, jobanyń quny jarııalanǵan kezde ózim de shoshyp qaldym. Biraq ol jobanyń ishine úńilip esepteseń, tıyn bolyp qalady. Qazir qarsylyqtan jasqanyp, toqtatyp qoıǵan sııaqty. Anyǵyn bilmeımin. Biraq Qabanbaı batyr kóshesin keńeıtip salyp shyǵý kerek», - dedi sáýletshi ǵalym.
Onyń aıtýynsha, Botanıkalyq baqtyń kesirinen Qabanbaı batyr kóshesine parallel ornalasqan eki kósheniń negizgi fýnktsııasyna nuqsan kelip otyr.
«Botanıkalyq baq túskenniń kesirinen eki kósheni joǵaltyp aldyq, Saýran men Aqmeshit kósheleri kólik júktemesin azaıtýǵa tolyq qatyspaı qaldy. Eki kósheni joǵaltqandyqtan, kórshi kóshelerdi kúsheıtý kerek. Al synnan qorqyp, osy kúıinde qaldyrýǵa bolmaıdy. Qabanbaı batyr kóshesin 8 jolaqty etip salý kerek. Bas jospardyń talaby sondaı», - dedi Sársenbek Júnisov.
Atalǵan sharada Sáýletshiler odaǵynyń basshysy Shymkentte ıppodrom ornyna úıdiń salynýyn synaǵan edi. Sondaı-aq ol astanadaǵy LRT qurylysynyń 1-kezeńin aıaqtap, jobany 5-inshi kezeńge deıin jalǵastyrýdy usyndy.
