Elordanyń iri saýda ortalyqtaryndaǵy máselelerdi sheshý boıynsha jumystar júrgizilmek
ASTANA. QazAqparat - Búgin Astana qalasynyń ákimi Ádilbek Jaqsybekov kezekti apparattyq jıyn ótkizdi. Kún tártibinde úleskerler máselesin sheshý, elordada bıznes júrgizý úshin qolaıly jaǵdaı jasaý, qalalyq sýpermarketterde qyzmet kórsetý júıesin jaqsartý jáne qaladaǵy sanıtarlyq jaǵdaıdy baqylaý máseleleri talqylandy, dep habarlaıdy elorda ákimdiginiń baspasóz qyzmetinen.
Apparattyq jıyn barysynda qalalyq sýpermarketterdegi tutynýshylarǵa qyzmet kórsetý deńgeıi talqylandy. Sońǵy ýaqytta áleýmettik jelilerde turǵyndar tarapynan atalmysh saýda oryndaryndaǵy qyzmet kórsetý men sol mekemeler deńgeıiniń tómendigine kóp syn aıtylady. - Elorda dúkenderinde qandaı jaǵdaılarǵa tap bolǵandary týraly turǵyndardyń narazylyqtary men shaǵymdary óte kóp, - dedi qala basshysy. Odan ózge, astanalyqtar sýpermarketterdegi esep aıyrysatyn kassalardyń jetkilikti bolǵanyna qaramastan, olardyń tek eki-úsheýi ǵana jumys isteıtindigine narazy. Al bul jaǵdaı uzyn-sonar kezekke alyp keledi. Qala basshysy Tutynýshylardyń quqyǵyn qorǵaý departamentine Kásipkerlik jáne ónerkásip basqarmasymen birge qaladaǵy iri saýda ortalyqtary ıelerimen atalǵan máselelerdi sheshý boıynsha tıisti jumysty júrgizýdi tapsyrdy.
