Elordanyń irgesindegi kún elektr stansasy salynyp bitýge taıady
KÓKShETAÝ. QazAqparat – Bıyl naýryz aıynda Aqmola oblysynda kúnnen energııa óndiretin qýaty 100 MVt elektr stansasy salynyp bitedi. Bul týraly jýrnalıstermen kezdesken Tselınograd aýdanynyń ákimi Málǵajdar Tátkeev aıtty, dep habarlaıdy QazAqparat tilshisi.
Aýdan ákiminiń aıtýynsha, joba Qazaqstan men Reseı áriptestiginiń aımaqaralyq 16-shi forýmynda qol qoıylǵan memorandým sheńberinde júzege asyrylyp jatyr.
«Kúnnen energııa óndiretin qýaty 100 MVt elektr stansasynyń qurylysy Qabanbaı batyr aýylynda júrgizilýde. «Hevel Qazaqstan» seriktestigi qolǵa alǵan jobanyń quny 30 mıllıard teńgeni quraıdy. Jobany bıylǵy jyldyń naýryz aıynda júzege asyrý josparlanǵan», - dedi Málǵajdar Tátkeev.
Jańa kún elektr stansasy balamaly energııa kózin 40 paıyzǵa deıin arttyrýǵa múmkindik beredi. Sonymen qatar, 30 adamǵa jumys orny ashylyp, qorshaǵan ortanyń lastanýyn azaıtýǵa septigin tıgizbekshi.
Aıta keteıik, aýdannyń 2019 jylǵy áleýmettik-ekonomıkalyq damýynyń qorytyndysy boıynsha jergilikti bıýdjettiń kirisi 29 mıllıard teńgeni qurady. Aýdan ekonomıkasyn damytý úshin 67,3 mıllıard teńge ınvestıtsııa tartyldy. Osynyń nátıjesinde ónerkásip ónimderiniń kólemi 35,7 mıllıard teńgege jetti. Aýdanda jalpy quny 6,3 mıllıard teńgeni quraıtyn 6 ınvestıtsııalyq joba júzege asyrylýda. Keleshekte bul jobalardy kásipkerlikti damytý kartasyna engizý josparlanǵan.
