Elordanyń irgesindegi Aqmola oblysyna qarasty 7 aýyl karantınde - Ermek Marjyqpaev
KÓKShETAÝ. QazAqparat – Elimizde koronavırýspen kúresý maqsatynda jarııalanǵan tótenshe jaǵdaıǵa baılanysty Aqmola oblysynyń ákimi Ermek Marjyqpaev oblys turǵyndaryna úndeý jarııalady, dep habarlaıdy QazAqparat tilshisi.
«Qurmetti aqmolalyqtar! Qazaqstan Respýblıkasy Prezıdentiniń Jarlyǵymen 2020 jylǵy 16 naýryzdan bastap elde tótenshe jaǵdaı engizildi. Mundaı shara elimizde Táýelsizdik alǵannan beri alǵash ret qabyldanyp otyr. Bul koronavırýstyq ınfektsııanyń taralýyn tómendetý boıynsha jasalǵan qajetti qadam. Koronavırýspen kúresý úshin barlyq medıtsınalyq uıymdar men quqyq qorǵaý organdarynyń qyzmetkerleri kúsheıtilgen tártipte jumys istep jatyr. Elimizge koronavırýstyq ınfektsııanyń enýine baılanysty, Aqmola oblysy aýmaǵynda vırýstyń taralýynyń aldyn alý boıynsha júrgizilip jatqan jumystar týraly habarlaǵym keledi», - dedi Ermek Marjyqpaev.
Aımaq basshysynyń aıtýynsha, Nur-Sultan men Almaty qalalarynda engiziligen karantınge baılanysty óńirdegi barlyq qyzmetter kúsheıtilgen rejımde jumys isteýge kóshti.
«Aqmola oblysyna shet elderden kelgen azamattar mindetti túde karantınge alynady. Búgingi kúni oblys boıynsha karantınde alynǵandardyń sany 31 adamdy quraıdy. Olar barlyq jaǵdaı jasalǵan, ózderiniń jaǵdaılary da qanaǵattanarlyq. Oblysta koronavırýs ınfektsııasy tirkelgen joq. Alaıda, óńirge engizilgen profılaktıkalyq sharalar kúshin joımaıdy», - dep odan ári jalǵastyrdy Ermek Marjyqpaev.
Osy rette, aımaq basshysy tótenshe jaǵdaı kezeńinde azyq-túlik qaýipsizdigin qamtamasyz etýge, sonymen qatar áleýmettik mańyzy bar azyq-túlik taýarlarynyń jetkizilýine jáne baǵany turaqtandyrýǵa basty nazar aýdarylyp otyrǵanyn atap ótti.
«Іri saýda obektileriniń, oıyn-saýyq mekemeleriniń jáne keıbir qoǵamdyq tamaqtaný obektileriniń jumysyna ýaqytsha shekteý engizildi. Alaıda, barlyq azyq-túlik dúkenderi, sýpermarketter, azyq-túlik bazarlary sanıtarııalyq jáne dezınfektsııalyq sharalardy kúsheıtý arqyly kúndelikti rejıminde jumys isteıtin bolady. Sonymen birge, barlyq kásipkerlerdi, baǵanyń turaqtylyǵyn saqtaý jáne halyqqa qajetti tamaq ónimderin jetkizý arqyly oblysymyzdyń turǵyndaryna, eń aldymen halyqtyń áleýmettik osal toptaryna qoldaý kórsetýlerin suraımyn», - dep tolyqtyrdy Ermek Marjyqpaev.
Sonymen qatar, aımaq basshysy Nur-Sultan qalasynyń irgesindegi Aqmola oblysyna qarasty Talapker, Qaraótkel (Ilınka), Qoıandy, Qosshy, Jibek joly, Y.Altynsarın jáne Taıtóbe sııaqty 7 aýyl karantın tizimine alynǵan atap ótti. Bul aýyldardyń turǵyndary elordaǵa kedergisiz qatynaı beredi. Tek, tótenshe jaǵdaı talaptaryn saqtaýlary kerek.
Sóz sońynda Ermek Marjyqpaev oblys turǵyndaryn jańa formatta atalyp ótilgeli turǵan Naýryz meıramymen quttyqtady.
