Elordanyń ftızıopýlmonologııa ortalyǵynda indet juqtyrǵan 17 áıel saý bala týǵan
NUR-SULTAN. QazAqparat – Ortalyq kommýnıkatsııalar qyzmetinde ótken onlaın brıfıngte qalalyq ınfektsııa ortalyǵynyń basshysy Tatıana Tsechoeva naýryz ben tamyz aralyǵynda qalalyq ftızıopýlmonologııa ortalyǵynda anasy koronavırýspen aýyrǵan 17 sábı dúnıege kelgenin aıtty, dep habarlaıdy QazAqparat tilshisi.
«Búgingi tańda meniń mekememde 6 aıaǵy aýyr jáne bosanǵan bir áıel jatyr. Naýryz ben tamyz aıy aralyǵynda qalalyq ftızıopýlmonologııa ortalyǵynda anasy koronavırýspen aýyrǵan 17 sábı dúnıege keldi. Sábılerdiń eshqaısy koronavırýspen aýyrǵan joq, olardy birneshe kún boıy baqylap, týystaryna tapsyrdyq, al analary ortalyqta emin jalǵastyra berdi. Osy ýaqytqa deıin 17 sábıdiń biri aýyryp qaldy degen aqparat alǵanymyz joq», - deıdi Nur-Sultan qalalyq ınfektsııalyq ortalyǵynyń basshysy Tatıana Tsechoeva.
QR DSM Ulttyq ftızıopýlmonologııa ortalyǵy dırektorynyń orynbasary Lázzat Eralıeva da atalǵan ortalyqta eshbir sábı koronavırýs dertimen týmaǵanyn aıtty.
«Dúnıejúzilik derekkózderge súıensek, jańa týǵan sábılerde aýrý sımptomdary bolmaıdy», - deıdi ol.
