Elordanyń Esil aýdanynda qurǵaq shóp pen qamys órtenip jatyr

NUR-SULTAN. QazAqparat – Elordanyń Esil aýdanyna qarasty Qorǵaljyń tas joly boıyndaǵy órtti sóndirý jumysy jalǵasýda, dep habarlaıdy QazAqparat tilshisi.

Nur-Sultan qalalyq tótenshe jaǵdaılar departamentiniń málimetinshe, atalǵan aýdanda órt shyqqany týraly habarlama 101 pýltine saǵat 15:03-te túsken.

«Oqıǵa ornyna jetken órt sóndirýshiler qurǵash shóp pen qamystyń janyp jatqanyn anyqtady. Órt sharpyǵan aýdan aldyn ala boljamǵa sáıkes bir gektardy quraıdy. Zardap shekkender men qaza tapqandar joq. Qazirgi ýaqytta órtti sóndirýge jeke quramnyń 25 mamany, 6 órt sóndirý mashınasy jáne jergilikti atqarýshy organnyń 4 sý shashatyn tehıkasy men bir traktory jumyldyrylǵan. Saǵat 17:31-de órt jartylaı sóndirildi. Ottyń Nur-Sultan qalasynyń jasyl beldeýine, qurylys nysandaryna taralýy qaýpi joq», - dep atap ótedi departamenttiń baspasóz qyzmetinen.