Elordanyń Esil aýdanynan 100 myń tonnaǵa jýyq qurylys qaldyǵy anyqtaldy
NUR-SULTAN. QazAqparat – Nur-Sultan qalasy Esil aýdanynyń aýmaǵynda 13 jerden qurylys qaldyǵy úıindisi anyqtaldy, onyń kólemi 100 myńǵa jýyq tonnany quraıdy. Bul týraly aýdan ákimi Berik Jákenov málim etti, dep habarlaıdy QazAqparat tilshisi.
«Aýdandyq ákimdikte aıyna bir ret QR Parlamenti Májilisi depýtattary, qalalyq Máslıhat depýtattary jáne basqa ortalyq apparat ókilderiniń qatysýymen «Partııa kúni» uıymdastyrylady. Atalǵan is-sharada sheshimin tappaı júrgen, júıelengen máseleler qarastyrylady. Búgingi kezekti jıynda qurylys qaldyǵy máselesin kóterýdemiz. Aýdan kóleminde júrgizilgen arnaıy monıtorıng nátıjesinde 13 jerden 100 myń tonnaǵa jýyq qurylys qaldyǵy úıindisi anyqtaldy. Osy oraıda tıisti uıymdardyń jaýapkershiligin qatańdatý jáne qaldyqty óńdeý máselesin sheshýdi usynyp otyrmyz», - dedi aýdan ákimi, Esil aýdandyq «Nur Otan» partııasy fılıalynyń tóraǵasy B. Jákenov.
Onyń aıtýynsha, atalǵan máseleni ýaqyt sozbaı quzyrly organdarmen birlesip zań aıasynda sheshken jón.
«Qalada 100-ge jýyq klınıngtik kompanııa jumys isteıdi. Ol uıymdar eko-polıgonmen 110 myń tonna qurylys qaldyǵyn shyǵarý týraly aldyn ala kelisim jasaǵan. Al is júzinde bar-joǵy 10 myń tonna qaldyq polıgonǵa jetkizilip otyr. Demek qalǵan 90 myń tonna qurylys qaldyǵy qala aýmaǵynda úıilip jatyr degen sóz», - deıdi ol.
Osy oraıda, aýdan ákimi eko-polıgonǵa qurylys qaldyqtarynyń shyǵarylýyn baqylaýdy kúsheıtý jáne qaldyqty shyǵarýǵa jaýapty kompanııalardyń esep berýi kerektigin basa aıtty.
Aıta ketsek, buǵan deıin elordanyń Esil aýdanynyń aýmaǵynda ornalasqan Botanıkalyq baqqa táýelsiz mártebesin berý ıdeıasy usynylǵan bolatyn.
