Elordanyń «Esil» aýdany 3 jyldyq merekesin toılaýda
ASTANA. 5 tamyz. QazAqparat /Aıdar Ospanalıev/ - Búgin elordanyń sol jaǵalaýynda oryn tepken «Esil» aýdany óziniń qurylǵanyna 3 jyl tolý merekesin atap ótýde.
Osy kúnge baılanysty arnaıy uıymdastyrylǵan shara barysynda jýrnalıstermen suhbattasqan «Esil» aýdanynyń ákimi Qaırat Jańabergenovtyń aıtýynsha, atalmysh aýdan 2008 jyly Elbasynyń Jarlyǵymen qurylǵan bolatyn. «Osy úsh jyldyń ishinde aýdanda qomaqty jumystar atqaryldy. Olardyń basym bóligi qurylys jumystarymen baılanysty. Aıtalyq, 3 jylda 64 turǵyn úı kesheni paıdalanýǵa berilgen. Olardyń jalpy kólemi 680 myń sharshy metrdi quraıdy», -dedi aýdan ákimi.
Onyń sózinshe, 3 jyl ishinde aýdanda turǵyn úılermen qosa qoǵamdyq ǵımarattar ashyldy. Onyń ishinde ortalyq stadıon, konkı stadıony, velotrek, kınokontsert zaly sııaqty alyp ǵımarattar bar. «3 jylda sonymen qatar 5 balabaqsha men 2 mektep paıdalanýǵa berilip, 4 medıtsına nysany jumysyn bastady. Qoryta kelgende 3 jyldyń ishinde úlken jumystar atqarylyp, aýdannyń turǵyn halqy da kóbeıdi. Qazirgi tańda olardyń sany 24 myńdy quraıdy. 3 jyl, árıne, aıtarlyqtaı kóp ýaqyt deýge kelmes. Degenmen, biz osy ýaqyt aralyǵynda atqarylǵan sharalardy kópshilikke tanystyryp, halyq odan habardar bolýy kerek degen nıetpen osyndaı merekelik sharany qolǵa alyp otyrmyz»,-dedi Q.Jańabergenov.
