Elordanyń emhanalaryn mıllıondarǵa «san soqtyratyndar» kimder
ASTANA. QazAqparat - Elordanyń emhanalary jyl saıyn jalǵan anyqtamalardyń satylýy saldarynan 25 mıllıon teńgeden qaǵylady. Bul týraly búgin «Astana - adaldyq alańy» jobasynyń jetekshisi Jazıra Jylqyshıeva medıtsına salasyn jańǵyrtý máseleri jónindegi semınar-keńeste aıtty, dep habarlaıdy QazAqparat tilshisi.
«Turmystyq jemqorlyqty tómendetý maqsatynda joba jalǵan medıtsınalyq anyqtama berý protsesine saraptama júrgizdi. Búginde zańsyz qyzmet kórsetý jónindegi habarlamalar jarnamalyq jáne áleýmettik jelilerde erkin ornalastyrylady. Azamattardyń medıtsınalyq tekserýden ótpesten-aq mundaı qujattardy paıdalanýy atalǵan anyqtamalardy satyp alǵan azamattardyń ómiri men densaýlyǵyna qater tóndirýmen qatar bilim berý, qoǵamdyq tamaqtaný uıymdary sııaqty áleýmettik mańyzy bar salalardyń qaýipsiz qyzmet kórsetýine de keri áserin tıgizedi»,- dedi ol.
Onyń aıtýynsha, atalǵan uıymdarmen «qupııa satyp alýshy» ádisimen júrgizilgen sharalar barysynda jalǵan medıtsınalyq anyqtamalar beretinder anyqtalyp, aqparattar Sybaılas jemqorlyqpen kúres ulttyq bıýrosynyń qalalyq departamentine joldanǵan.
«Jemqorlyqqa qarsy qyzmeti júrgizgen jumystardyń nátıjesinde 12 mamyr kúni jalǵan medıtsınalyq qujattardy daıyndaýmen aınalysatyn toptyń qylmystyq áreketiniń joly kesildi. Eń tómengi esepteýlerge sáıkes anyqtalǵan bir faktiniń ózinde ǵana elordanyń emhanalary jylyna 25 mln teńgeden astam qarjydan qaǵylyp otyrǵan. Al bul qarajatty patsıentterge jaıly jaǵdaı jasaýǵa, sonymen qatar medıtsınalyq mekeme qyzmetkerlerine syıaqy tóleýge jumsaýǵa bolar edi», - dedi Jazıra Jylqyshıeva.
Osy rette joba jetekshisi medıtsınalyq anyqtamalar usyný salasyndaǵy problemalardy keshendi sheshý maqsatynda Eńbek jáne halyqty áleýmettik qorǵaý, Densaýlyq saqtaý mınıstrlikterine anyqtamalardy, sanıtarlyq kitapshalardy berý protsesin avtomattandyrý qyzmetiniń shekti qunyn belgileý boıynsha usynys engizilgendigin aıtty.
Sonymen qatar jumys berýshi jumysqa qabyldanatyn adam usynǵan medıtsınalyq anyqtamanyń jalǵan emestigin tekserýge mindettelmek.
