Elordanyń ekologııasyna áser etetin negizgi faktorlar ataldy
NUR-SULTAN. QazAqparat – Nur-Sultan qalasy ákiminiń orynbasary Altynbek Qaısaǵalıev astananyń ekologııasyna áser etetin negizgi faktorlardy atady, dep habarlaıdy QazAqparat tilshisi.
«Atmosferanyń lastaný ındeksin qadaǵalap otyramyz. 2018 jyldyń qorytyndysyna sáıkes elordada ol ındeks 4,95 birlik bolsa, 2019 jyly 4,98 birlikti kórsetti. Jalpy ekologııalyq ahýal qalamyzda turaqty. 2020 jyldyń birinshi toqsanynda osy kórsetkish saqtalady. Degenmen Ekologııa departamentiniń boljamyna sáıkes ol kórsetkish kúrt tómendeýi múmkin. Óıtkeni tótenshe jaǵdaı men karantınge baılanysty avtokólikter qozǵalysy kúrt azaıǵanyn bilesizder. Sondyqtan atmosferaǵa shyǵatyn lastanýshy zattardyń bári de tómendedi. Ekinshi toqsanda da taǵy tómendeıtini kútilip otyr», - dedi «ASTANA TV» telearnasynda Elorda live-ta bergen suhbatynda.
Onyń aıtýynsha Nur-Sultannyń ekologııasyna áser etetin negizgi úsh faktor bar.
«Birinshisi – avtokólikterdiń sanynyń ósýi. Qalada 350 myńnan astam kólik tirkelgen. Kúnnen kúnge bul san artyp ta keledi. Ekinshisi – JEO-1 jáne JEO-2 bar. Qalamyz jyldan jylǵa ósip kele jatyr. Salynyp jatqan úıler kóp. Olardyń bárin de jylýmen, elektr qýatymen qamtý kerek. Sondyqtan osy ortalyqtardyń otyn jaǵý qýatynyń artýyna baılanysty atmosferaǵa shyǵaryndylary da kóp bolady. Úshinshi másele – qalada 380-nen astam statsıonarlyq qazandyq ornatylǵan. Olardyń sany da artyp keledi. Eger osy úsh faktordyń máselesin shesher bolsaq qalamyzdaǵy ekologııalyq jaǵdaıdy edáýir jaqsartýǵa bolady», - dedi ol.
