Elordanyń Densaýlyq saqtaý basqarmasy jarty jyldaǵy jumysyn qorytyndylady
NUR-SULTAN. QazAqparat - Elorda ákiminiń orynbasary Ashat Oralovtyń tóraǵalyǵymen qalalyq Qoǵamdyq densaýlyq saqtaý basqarmasynyń osy jyldyń birinshi jartyjyldyǵynyń qorytyndysy boıynsha esep berý alqasy onlaın rejıminde ótti, dep habarlaıdy QazAqparat qala ákimdigine silteme jasap.
Otyrysqa Densaýlyq saqtaý birinshi vıtse-mınıstri Marat Shoranov, Qoǵamdyq densaýlyq saqtaý basqarmasynyń basshysy Tımýr Muratov, qalanyń medıtsınalyq uıymdarynyń basshylary qatysty.
Qala ákiminiń orynbasary 2021 jyldyń II jartyjyldyǵyna qalalyq Densaýlyq saqtaý salasynyń aldyna mindetter qoıdy. Birinshi kezekte -koronavırýstyq ınfektsııaǵa qarsy jappaı vaktsınatsııalaýdy aıaqtaý, Densaýlyq saqtaý júıesiniń ınfraqurylymyn odan ári damytý, kadr tapshylyǵyn azaıtý, Densaýlyq saqtaýdy damytýdyń 2020-2025 jyldarǵa arnalǵan memlekettik baǵdarlamasyn iske asyrý, MÁMS júıesinde medıtsınalyq kómek kórsetý jáne basqalar.
Sondaı-aq Ashat Oralov ana ólimin azaıtýdyń oń úrdisin atap ótti.
«Jumysty osyndaı qarqynmen jalǵastyrý kerek, sondaı-aq aldyn alý sharalaryn kúsheıtý jáne medıtsına qyzmetkerleriniń biliktiligin úzdiksiz arttyrý protsesin jetildirý qajet», - dep atap ótti qala basshysynyń orynbasary.
Densaýlyq saqtaý vıtse-mınıstri de birqatar kórsetkishter boıynsha oń dınamıkany atap ótti.
«Nur – Sultan qalasynda kórsetkishter boıynsha oń dınamıka baıqalady - balalar arasynda semizdikpen aýyrý azaıdy (0-14 jas), medıtsınalyq uıymdardy medıtsınalyq tehnıkamen jabdyqtaý deńgeıi artty, medıtsınalyq uıymdar ǵımarattarynyń tozý deńgeıi tómendedi, Densaýlyq saqtaýdaǵy jeke ınvestıtsııalardyń úlesi artty. Sonymen qatar, qan aınalymy júıesi aýrýlary men jaraqattardan bolatyn ólim - jitimniń ósýine nazar aýdarý qajet», - dep atap ótti Marat Shoranov.
Qalalyq densaýlyq saqtaý basqarmasynyń basshysy óz baıandamasynda alǵashqy medıtsınalyq-sanıtarlyq kómek kórsetetin medıtsınalyq uıymǵa tirkelý máselesine erekshe nazar aýdardy.
«Osy memlekettik qyzmetti qatań túrde qoldanystaǵy normatıvtik quqyqtyq aktilerge sáıkes kórsetýdi jáne ony kórsetý merzimderin buzý jáne negizsiz bas tartý faktilerine jol bermeýdi qamtamasyz etý qajet. Sońǵylary barynsha dáleldi bolýy tıis», - dedi Tımýr Muratov.
Otyrys sońynda qala ákiminiń orynbasary vaktsınatsııa pasporttaryn burmalaý faktilerin baqylaýǵa alýdy tapsyrdy. Elorda búginde «qyzyl aımaqta» ekenin eskere otyryp, medıtsınalyq uıymdardyń jumysyn kúsheıtý qajet.
«Koronavırýstyq ınfektsııamen kúres jaǵdaıynda dárilik zattardyń 3 aılyq qorynyń bolýyn qamtamasyz etý qajet. Medıtsınalyq jabdyqtarǵa, dári-dármekterge turaqty negizde túgendeý júrgizý kerek. Biz naýqastardy emdeý kezinde qajetti dárilerdiń bolmaýyna jol bermeýimiz kerek. Statsıonar basshylarynan reanımatsııalyq bólimshelerdegi naýqastarǵa erekshe nazar aýdarýdy suraımyn. Kún saıyn mýltıdıstsıplınarlyq konsılıýmdar ótkizý qajet», - dep túıindedi sózin Ashat Oralov.
