Elordanyń dárigerlerine syıaqy beriledi
NUR-SULTAN. QazAqparat - Avtobýstardyń soqtyǵysýy kezinde bolǵan iri jol-kólik apatynda biraz adam jaraqat aldy. Olarǵa jyldam ári kásibı medıtsınalyq kómek bergen mamandarǵa syıaqy beriledi. Bul týraly búgin qalalyq qoǵamdyq densaýlyqty saqtaý basqarmasynyń eks-basshysy Qamaljan Nadyrov málim etti. Birneshe saǵattan keıin ol QR Densaýlyq saqtaý vıtse-mınıstri qyzmetine taǵaıyndaldy, dep habarlaıdy QazAqparat tilshisi.
«Keshe barlyq qyzmetter bir judyryq bolyp jumylyp, kásibı qyzmet kórsete bildi. Sonyń arqasynda zardap shekkenderge der kezinde kómek kórsetildi. Sol úshin óz áriptesterime zor alǵysymdy aıtamyn. Olardyń barlyǵy ákimdiktiń alǵys hattarymen marapattalady. Budan bólek, jumys ornynan syıaqy beriledi», - dedi Q.Nadyrov arnaıy baspasóz máslıhatynda.
Brıfıngte jedel medıtsınalyq járdem stansasynyń bas dárigeri Tımýr Muratov ta qatysty. Ol keshegi jol-kólik apaty kezinde medıtsına qyzmetkerleriniń qalaısha áreket etkenin áńgimelep berdi.
«Keshe tańǵy saǵat 9:19-da «103» nómirine iri jol-kólik apaty týraly jedel habar tústi. Biz birden GPS júıesi arqyly jaqyn júrgen kólikti anyqtadyq. Biraq onyń da jol-kólik apatyna ushyraǵanyn bilmedik. Soǵan qaramastan, jaraqat alǵan bir feldsherimiz ratsııa arqyly baılanysqa shyǵyp, kómek bere alatynyn jetkizdi. Sosyn ótip bara jatqan bir avtobýsta taǵy bir feldsherimiz boldy. Ol da jetip keldi. Sóıtip, úsheýi aýyr jaraqat alǵan azamattarǵa kómek berýge kiristi. Qandy toqtatyp, eseńgirep qalǵandarǵa em-dom saldy. Úsh mınýttan keıin birinshi brıgada kelip, eń aýyr jaraqat alǵan adamdy aýrýhanaǵa jetkizdi. Jalpy, keshe 30 mınýttyń ishinde 22 adam statsıonarǵa jetkizildi», - dep atap kórsetti T.Muratov.
Bas dárigerdiń sózine qaraǵanda, jedel medıtsınalyq qyzmet óz jumysyn kásibı turǵyda jyldam ári sapaly atqara bildi. Bunyń barlyǵy - sońǵy reformalardyń nátıjesi.
«Máselen, ótken jyly bizdiń mamandarymyz alǵash ret Izraıldiń jedel járdemin meńgerip keldi. Ol jaqtyń qyzmeti álem boıynsha eń úzdik bolyp sanalady. Keshe jol-kólik apatynda bolǵan tórt mamanymyz Izraılde oqyp kelgen. Olar óz daıyndyǵyn sheber kórsete bildi», - dedi T.Muratov.
Aıta keteıik, búgingi jıynda 2-shi kópbeıindi aýrýhananyń bas dárigeri Ivan Lı keshegi jol-kólik apatynda zardap shekkenderdiń jaǵdaıy týraly aıtyp berdi. Onyń sózine qaraǵanda, aýrýxanaǵa jetkizilgen bir áıel arqasynan qatty jaraqat aldy. Ony neıroxırýrgııa ortalyǵyna aýystyrýǵa sheshim qabyldandy. Qalǵan adamdarǵa birden kómek kórsetildi.
«Jalpy, keshe bes ota jasaldy. Búginde úsh adamnyń jaǵdaıy aýyr. Biraq kóbisi esin jıdy. Jaǵdaılary turaqty. Sondyqtan olardyń ómirine qaýip tónip turǵan joq dep aıta alamyz. Osylaısha, travmotologııa bólimshesinde 8 adam em-dom alýda. Tarakaldy xırýrgııada eki adam, al jansaqtaý bóliminde úsh adam jatyr», - deıdi I.Lı.
Onyń sózine qaraǵanda, zardap shekken bir áıeldiń aıaǵyn ampýtatsııalaýǵa týra keldi. Al Fılıppın elinen kelgen bir áıeldiń keýdesine ota jasalady.
