Elordanyń botanıkalyq baǵy Eýropadan ákelingen ósimdiktermen tolyqty
ASTANA. QazAqparat - Qala kúnine baılanysty astanalyq botanıkalyq baqta ósimdikterdiń kóptegen túri otyrǵyzyldy. Aǵashtardy otyrǵyzý sharasyna qala basshysy men álemniń ártúrli elderinen kelgen EKSPO komıssarlary qatysty, dep habarlaıdy elorda ákimdiginiń baspasóz qyzmeti.
Olar otyrǵyzylǵan kóshetterdiń janyna ózderiniń qoltańbalaryn qaldyrdy. Aktsııa qatysýshylary aldaǵy ýaqytta jospar boıynsha qalyń orman bolatyn baqshaǵa xalyqaralyq mártebe berdi. Aıta ketken jón, elordada bul botanıkalyq baq Elbasynyń tapsyrmasymen salyndy.
Botanıkalyq baqtyń aýmaǵy 92,2283 gektardy quraıdy, jasyldandyrylǵan aýmaq 587965,7 sharshy metr. Búginde aýmaqta 93200 tal kóshet otyrǵyzylǵan, onyń 26946 danasy - aǵash jıyntyǵy, 12346 dana buta jıyntyǵy, bas-aıaǵy 39292 dana ósimdik jáne 53905 dana butaly qorshaý otyrǵyzyldy.
Búgingi ekologııalyq aktsııany shet memleketterdiń ókilderi de qoldady. Syılyq retinde qala turǵyndary úshin Polsha memleketiniń bılik ókilderi Eýropanyń baqshasynan jóke, emen, alma, sheten sekildi tal-terekterdi ákeldi. Salynyp jatqan botanıkalyq baqtyń aýmaǵyna 214 aǵash otyrǵyzyldy.
Polsha delegatsııasynyń ókilderi atap ótkendeı, olar bul ósimdikterdi, tal-terekterdi óz elderinde ótip jatqan "Mınýtyna myń aǵash" aktsııasy aıasynda ákelgen. Aıta keteıik, Polshada jyl saıyn 500 mln aǵash otyrǵyzylady. Bul ıdeıa Elbasynyń "Astana qalasy mańynda jasyl beldeý" jobasyna uqsas, deıdi uıymdastyrýshylar.
Baq aýmaǵynda aqqaıyń, qara terek, qyzyl úıeńki, úshkir japyraqty úıeńki, sýarmaly úıeńki, arsha, manchjýr jańǵaǵy, maıqaraǵaı jáne t.b. ósimdikter túri otyrǵyzylǵan. Baqtyń aýmaǵynda 2 jylyjaı salynyp jatyr. Botanıkalyq baq qala turǵyndary men qonaqtar úshin osy jyldyń kúzinde ashylady.
