Elordanyń birqatar medıtsına qyzmetkeri qala ákiminiń qolynan páter kiltin aldy
ASTANA. Maýsymnyń 17-si. QazAqparat /Marlan Jıembaı/ - Búgin elordadaǵy Kongress-Holl saraıynda elimizde maýsymnyń úshinshi jeksenbisinde atalyp ótiletin Medıtsına qyzmetkerleri kúni merekesine oraı mádenı is-shara ótti.
Osy shara barysynda sóz alǵan qala ákimi Imanǵalı Tasmaǵambetov elordalyq medıtsına qyzmetkerlerin aldaǵy merekelerimen quttyqtaı kelip, «Astana kúni qarsańyndaǵy bul meıram tek dárigerlerdiń merekesi emes. Bul barsha astanalyqtar úshin abyroıly kún. Óıtkeni aq jeleńdi abzal jandardyń ár kúngi eńbegi adam ómiriniń Alladan keıingi arashashysy. Kim úshin de densaýlyq qashanda kúndelikti tirshiliktiń tiregi, kóńildiń kórmesi, ómirdiń ózegi sanalady. Odan asqan qundylyq joq, bolǵan emes te. Endeshe ony baıyptaıtyn da, saqtaıtyn da sizdersizder. Osy kúni 8 myńnan astam dárigerler, medıtsına qyzmetkerleri tuǵyrly qalamyzdyń turǵyndarynyń densaýlyǵyn qadaǵalap, qaltqysyz eńbek etýde. Elordanyń jyl sanap emes, kún sanap ósip-órkendeýi medıtsına mekemeleriniń aldynda syndarly mindet, salmaqty jaýapkershilik júkteıdi. Sizderdiń osynaý úlken talaptyń údesinen shyǵyp júrgenderińizge kúmán joq. Densaýlyq - ózegi, ólshemi joq ózgeshe dúnıe. Onyń sapasyn saralap, kútimin kóterý tynymsyz izdenisti, tııanaqty eńbekti qajet etedi», dedi.
Kongress-Holl saraıyna jınalǵan medıtsına qyzmetkerlerin shyn kóńilimen quttyqtaǵan I.Tasmaǵambetov osydan keıin Astana qalasynyń birqatar qyzmetkerin elorda ákiminiń qurmet gramotasymen marapattap, qalalyq № 2 aýrýhananyń bólim meńgerishisi Maqsat Janturǵanovqa, Astana qalalyq densaýlyq saqtaý basqarmasy bastyǵynyń orynbasary Laýra Ahmetnııazovaǵa, №3 perzenthananyń dárigeri Aıgúl Aljasarovaǵa, jedel járdem stansysynyń dárigeri Átirkúl Jákishevaǵa, Jaınagúl Jumaevaǵa páter kiltin tabys etti.
