Elordanyń birqatar kóshelerinde júk kóligi men arnaýly kóliktiń qozǵalysyna ýaqyttyq shekteý qoıylady
ASTANA. QazAqparat - 14 qyrkúıekten bastap Astana qalasynyń belgili kóshelerinde júk kóligi men arnaýly kóliktiń qozǵalysyna ýaqyttyq shekteý qoıylady. Bul bastama Jolaýshy kólik jáne avtomobıl jol basqarmasy, Ákimshilik polıtsııa basqarmasy jáne «Astana LRT» kompanııasymen birigip júzege asyrylyp otyr, dep habarlady astana.gov.kz.
Atalǵan shekteý tańǵy saǵat 7.00-den keshki 21.00-ge deıin sozylyp, 2 ýchaskeni qamtydy.
Ýchaske №1. Bógenbaı batyr dańǵyly boıymen Aqjol kóshesinen Beısekov kóshesine deıingi aýmaq. Uzyndyǵy - 8,6 km. Balama jol retinde júk kóligi men arnaýly kólik Alash tas joly boıymen, «Astana aınalma joly» dep atalatyn avtomobıl jolynyń Tilendıev kóshesinen Beısekov kóshesine deıingi joly arqyly óte alady.
Ýchaske №2. Tórt úlken kósheni qamtıdy. Qoshqarbaev kóshesi (Tólebaev kóshesinen Sarykól kóshesine deıin), Baıtursynov kóshesi (Sarykól kóshesinen Obaǵan kóshesine deıin), Syǵanaq kóshesi (Táýelsizdik kóshesinen bastap Turan kóshesine deıin) jáne Qabanbaı batyr dańǵyly (Syǵanaq kóshesinen bastap Hýseın ben Talal kóshesine deıin). Balama jol retinde júk kóligi men arnaýly kólik Qaraǵandy tas joly arqyly Tólebaev kóshesinen Astana-Qaraǵandy kóliktik aıryǵy arqyly, odan keıin Qabanbaı batyr dańǵyly boıymen Qarqaraly tas jolymen qıylystaǵy aınalmaly aıryqqa deıingi jolmen júre alady.
Ótkizgen saraptamaǵa júginsek, júk kóligi Bógenbaı dańǵylyn qarbalas sát kezinde 21 km/saǵ. jyldamdyqpen 24 mınýtta ótedi. Balama jol arqyly júrgen jaǵdaıda, bul kórsetkish 7 mınýtqa artady. Alaıda kóliktiń jyldamdyǵy 60-63 km/saǵ. jetedi. Ekinshi jol boıymen júk kóligi qarbalas ýaqyt kezinde 28 km/saǵ jyldamdyqpen 28 mınýtta ótetin edi. Balama jol arqyly kóliktiń jyldamdyǵy 60-63 km/saǵ deıin artyp, 4 mınýtqa kóp ýaqyt alady.
Bul shekteýler mynadaı máselelerdi sheshýge oń yqpalyn tıgizedi: atalmysh kóshelerdegi jol keptelisi; ýchaskelelerge jalǵanǵan kóshelerge túsetin salmaq; qalanyń negizgi kóshelerindegi júk kóliginiń qarqyndy qozǵalysy; salmaq kóp túsetin kóshelerde qoǵamdyq kóliktiń kóp bolýy; kólik aǵymy jyldamdyǵynyń tómen bolýy, osynyń negizinde qorshaǵan ortaǵa keltiriletin zardap.
Júk kóligin shekteý atalmysh kóshelerde qarbalas ýaqytta kólik aǵymy jyldamdyǵynyń artýyna ákeledi. Osylaısha, Bógenbaı dańǵylynyń keı ýchaskelerinde jyldamdyq 4km/saǵ ósse, Syǵanaq kóshesiniń boıyndaǵy kólik jyldamdyǵy 5 km/saǵ deıin artady.
