Elordanyń birqatar kóshelerinde avtokólik qozǵalysyna shekteý qoıyldy - Astana qalalyq ІІD JPB
ASTANA. Tamyzdyń 19-y. QazAqparat - Búgin jol jóndeý jumystarynyń bastalýyna oraı elordanyń birqatar kóshesinde avtokólik qozǵalysyna shekteý qoıyldy. Bul aqparatty Astana qalalyq jol polıtsııasy basqarmasynyń baspasóz qyzmeti taratyp otyr.
Atap aıtqanda, búgin Seıfýllın kóshesiniń boıy asfalttaýǵa daıyndyq júrgizilýine oraı kólikterdiń qozǵalysyna Respýblıka dańǵylynan Aımanov kóshesine deıin jartylaı shekteldi. Sonymen qatar jıek tastardyń ornatylýyna baılanysty Seıfýllın kóshesi Jeńis dańǵylynan Ýálıhanov kóshesine deıin jartylaı jabyldy.
Syǵanaq kóshesinde de M-3 kópirge deıin jáne Qabanbaı batyr dańǵylyna deıin jartylaı shekteý qoıyldy. JPB baspasóz qyzmetiniń habarlaýynsha, atalǵan kóshe boıynda múgedekterge arnalǵan joldar jasaý jumystary júrgizilýde.
