Elordanyń bir aýdanyna 12 balabaqsha salynady
ASTANA. QazAqparat - Elordanyń «Almaty» aýdanynda 12 balabaqsha salynady, dep habarlaıdy QazAqparat qala ákimdigi saıtyna silteme jasap.
Aldaǵy tórt jyldyń ishinde «Almaty» aýdanynda 4 myń orynǵa arnalǵan 12 balabaqsha salyný josparlanyp otyr. Aýdan ákimi Ádilbek Sársembaev halyqpen kezdesýi barysynda osylaı málim etti.
Dál qazirgi tańda «Almaty» aýdanynda turatyn 15 myńnan astam bala (mektepke deıingi balalardyń jalpy sany 59%) balabaqsha kezeginde tur.
«Ótken jyly orynnyń jetispeýshiligin azaıtý maqsatynda eki balabaqshanyń qurylysy aıaqtalǵan bolatyn. Aldaǵy tórt jylda aýdanda 4 myń orynǵa arnalǵan 12 balabaqshanyń qurylysy josparlanyp otyr», - dedi Ádilbek Sársembaev.
Búginde aýdanda 19 442 orynǵa arnalǵan 132 mektepke deıingi uıymdar jumys isteıdi, onyń 36-sy - 10 151 orynǵa eseptelgen memlekettik balabaqsha. Sonymen qatar, memlekettik-jekeshelik áriptestik jobasy aıasynda 96 jekemenshik balabaqshadan 9 291 orynǵa memlekettik tapsyrys berilgen.
