Elordanyń bilim basqarmasy chattarda taraǵan aqparatty joqqa shyǵardy
NUR-SULTAN. QazAqparat - Elordanyń bilim basqarmasy áleýmettik jelilerde taraǵan aqparatqa senbeýge shaqyrdy , dep habarlaıdy QazAqparat tilshisi.
Resmı málimetke sáıkes, sońǵy kúnderi aǵymdaǵy jyldyń 20 sáýirinen bastap balalardy balabaqshalarǵa toptaý kezegi bastalady degen aqparat taralyp júr. «Sol sebepti «ZAINTERESOVAN» degen bastyrmany der kezinde basyp qalý úshin tańǵy saǵat 6-dan bastap e.astana saıtynda otyrý qajet. Balabaqshanyń nómirin de bilý kerek. Sonda balabaqsha oryndaryn taratqanda ony birden taýyp alýǵa bolady», - delingen habarlamada. Bilim basqarmasy atalǵan aqparatty joqqa shyǵardy.
«Bilim basqarmasy tarapynan bul aqparattyń shyndyqqa sáıkes kelmeıtinin habarlaımyz. Jospar boıynsha mektepke deıingi uıymdarǵa toptaýdy 2019 mamyr aıynyń ortasynda kózdep otyrmyz, ol týraly aqparat aldyn ala mindetti túrde ata-analarǵa buqaralyq aqparat quraldary men Nur-Sultan qalasynyń resmı resýrstary arqyly habarlaımyz», - deıdi basqarmanyń baspasóz hatshysy Jazıra Asanova.
Aıta keteıik, bilim basqarmasynyń resmı ınternet resýrsy - bilim.astana.kz, áleýmettik paraqshalary - /bilimastana. Sonymen qatar, búgingi tańda elordalyq balabaqshaǵa joldama alý elektrondy memlekettik qyzmetter kórsetý e.astana.kz portaly arqyly (ETsQ-men) táýlik boıy qoljetimdi.
