Elordanyń Beısekova kóshesinde kólik jyldamdyǵy 20 km/saǵatqa tómendetildi
NUR-SULTAN. QazAqparat - Astanada sol jaǵalaýǵa baratyn Sh.Beısekova kóshesinde kólik jyldamdyǵy 80 km/saǵattan 60 km/saǵatqa deıin tómendetildi, dep habarlaıdy QazAqparat qalalyq polıtsııa departamentiniń baspasóz qyzmetine silteme jasap.
«Nur-Sultan qalalyq Polıtsııa departamentiniń Ákimshilik polıtsııa basqarmasy 31 mamyrdan bastap Shabal Beısekova kóshesiniń Shaımerden Qosshyǵululy kóshesi men E10 kóshesine deıingi aralyǵynda eki baǵytta qatarynan jyldamdyq rejimi 80km/saǵattan 60km/saǵatqa deıin ózgertilgenin habarlaıdy», delingen habarlamada.
Basqarmanyń málimetinshe, atalǵan shara jol qozǵalysynyń qaýipsizdigin qamtamasyz etý úshin jáne osy ýchaskede jol-kólik oqıǵalarynyń jıilep ketýine baılanysty qolǵa alynǵan.
Tártip saqshylary atalǵan kósheniń boıynda «Sergek» avtomatty tirkeý quralynyń ornatylǵanyn eskerte otyryp, júrgizýshilerden jyldamdyq rejimin saqtaýdy suraıdy.
Aıta keterligi, Sh.Beısekova kóshesi 2013 jyly qazan aıynda paıdalanýǵa berilgen. Ol qaladaǵy kishi kólik aınalma jolynyń qataryna enedi. Uzyndyǵy 35 shaqyrym bolatyn aınalma jol táýligine 90 myń kólikti ótkize alady. Osy kóshemen negizgi kólik aǵyny oń jaǵalaýdan sol jaǵalaý baǵytyndaǵy júredi.
