Elordanyń Baıqońyr aýdanynda súriletin úıdiń turǵyndaryna baspana beriledi

NUR-SULTAN. QazAqparat – Nur-Sultan qalasynyń Baıqońyr aýdanynda súriletin úıdiń turǵyndaryna «Nurly jer» baǵdarlamasy arqyly baspana beriledi. Bul týraly búgin aýdan ákimi Asqar Esilov aıtty, dep habarlaıdy QazAqparat tilshisi.

«Óndiris» turǵyn úı alabynda 22 turǵyn úıdiń bireýi apatty jaǵdaıda. Ony súrip, turǵyndardy bıyl «Nurly jer» baǵdarlamasy boıynsha qonystandyrý kózdelip otyr», - dedi ol elorda ákimdiginde ótken qoǵamdyq tyńdaý barysynda.

Sonymen qatar Asqar Esilov Baıqońyr aýdanynyń aýmaǵyndaǵy turǵyn úı alaptarynda 4 mektep, 2 memlekettik balabaqsha jáne 1 kolledj bar ekendigin aıtty. Ol mektepterdegi oryn jetispeýshiligi problemasyna toqtaldy.

«Bastaýysh synypta oqıtyn balalar №34 orta mektebinde úsh aýysymmen bilim alyp jatyr. Bul mekteptiń jobalyq qýaty 330 orynǵa shaqtalǵan. Al is júzinde 721 bala oqyp júr. Al №23 orta mekteptiń jobalyq qýaty 736 oryn bolsa, qazir 770 bala bilim alady», - dedi aýdan ákimi.

Osy oraıda ol bul problemany sheshý joldaryn da usyndy.

«Osyǵan oraı júktemeni tómendetý jáne úsh aýysymdyq bilim berý problemasyn sheshý úshin atalǵan mektepterge japsarlas qurylys nysandaryn salý múmkindigin qarastyrý qajet», - dedi A.Esilov.