Elordanyń Baıqońyr aýdanynda 86 aýla abattandyrylady
NUR-SULTAN. QazAqparat - Kelesi jyly elordanyń Baıqońyr aýdanyndaǵy 86 aýlany abattandyrý josparlanyp otyr, dep habarlaıdy QazAqparat aýdan ákimdigine silteme jasap.
Ákimdiktiń málimetinshe, onyń ishinde 25 aýlada temir garajdar ornatylǵan. Baıqońyr aýdany ákimdigi apparatynyń qyzmetkerleri garaj ıeleriniń arasynda nysandardy 15 sáýirge deıin alyp tastaý keregi jóninde túsindirý jumystaryn júrgizýge kirisken.
«Sebebi temir garajdar aýdan kelbetin buzyp qana qoımaı, ortaq aýmaqtyń kóp bóligin basyp alǵan. Eske sala ketsek, bıyl aýdanda zańsyz salynǵan 202 metall garajy alynyp tastaldy. Nátıjesinde 10 000 sharshy metrden astam jer ýchaskesi bosap, sol aýmaqqa qarasty úılerdiń menshigine qaıtaryldy. Tıisti abattandyrý jumysy júrgizilgennen keıin, qazir ol jerlerde demalys alańdaryna aınalǵan», delingen habarlamada.
Aıta ketetin jaıt, Baıqońyr aýdany aýmaǵyndaǵy zańsyz nysandardy joıý jumystary josparlanǵan kestege sáıkes jalǵasady.
