Elordanyń bas sanıtarlyq dárigeri úndeý jasady

NUR-SULTAN. QazAqparat – Elordanyń bas sanıtarlyq dárigeri Sarhat Beısenova koronavırýs ınfektsııasynyń qaýpin umytpaý kerektigin aıtyp qala turǵyndaryn saqtanýǵa shaqyrdy, dep habarlaıdy QazAqparat qala ákimdiginiń saıtyna silteme jasap.

Onyń aıtýynsha, qańtardyń alǵashqy onkúndiginde elorda «sary» jáne «qyzyl» aımaqtardyń shekarasynda tur. Jańa jyldyq merekelerden keıin ınkýbatsııalyq kezeń aıaqtalǵanyn eskere otyryp, koronavırýspen aýyratyn naýqastar sany artyp keledi.

«Qazir qala «sary aımaqta» ornalasqanyna qaramastan syrqattanýshylyq sanynyń ósýi baıqalady. Bul, bir jaǵynan, COVID-19 ınfektsııasyna test tapsyratyn adam sanynyń eki ese ósýine, al ekinshi jaǵynan qala turǵyndarynyń jańa jyl kúnderi shekteý sharalaryn saqtamaýyna baılanysty.

Sondaı-aq aıryqsha atap óterligi – dárigerlerge ózdiginen qaralatyn halyqtyń úlesi artyp keledi. Bul turǵyndardyń jaýapkershiligi joǵary ekenin jáne koronavırýs ınfektsııasynyń saldaryna alańdaıtynyn kórsetedi. Óz betimen em-dom qoldanýǵa bolmaıdy. Ózin, týystaryn jáne aınalasyn qorǵaý úshin sanıtarlyq normalardy qatań saqtap, maska taǵý qajet», - dedi Sarhat Beısenova.

Elordanyń bas sanıtarlyq dárigeri koronavırýspen aýyrǵandar qatary ósken jaǵdaıda qosymsha karantın shekteý sharalary qabyldanatynyn atap ótti.