Elordanyń bas sanıtarlyq dárigeri turǵyndarǵa úndeý jasady
NUR-SULTAN. QazAqparat – Nur-Sultan qalasynyń bas memlekettik sanıtarlyq dárigeri Sarhat Beısenova halyqty karantın sharalaryn saqtaýǵa jáne indetke qarsy vaktsına alýǵa shaqyrdy, dep habarlaıdy QazAqparat tilshisi.
«Qurmetti elorda turǵyndary men qonaqtary! Qaladaǵy epıdemıologııalyq jaǵdaı turaqsyz bolyp qalýda. Osyǵan baılanysty qala turǵyndaryna, ásirese úı karantınindegi adamdarǵa, sondaı-aq kásipkerlik sýbektilerine aıtarym, barlyq shekteý sharalary men sanıtarlyq erejelerdi saqtańyzdar, bul ınfektsııanyń taralýyn tómendetýge jáne aýrý qaýpin azaıtýǵa múmkindik beredi», - dedi S. Beısenova elorda ákimdiginde ótken brıfıngide.
Sonymen birge, elordada halyqty COVID-19-ǵa qarsy vaktsınalaý boıynsha jappaı naýqan júrgizilip jatyr. Elordanyń árbir turǵyny, qasıetti Ramazan aıynda oraza ustap, aýyz bekitkenderdiń de COVID-19-ǵa qarsy ekpe alýǵa jáne ózin indetten qorǵaýǵa múmkindigi bar, ol úshin ekpe pýnktteri saǵat 24.00-ge deıin jumys isteıdi.
«Buryn habarlanǵandaı, COVID-19-ǵa qarsy vaktsınany qabyldaý orazany buzbaıdy, eger belgili bir zattyń as qorytý júıesine aýyz, muryn sııaqty tabıǵı sańylaýlar arqyly ense, oraza buzylady. Al ınektsııalar kezinde jáne koronavırýsqa qarsy vaktsınany egý atalǵan jaǵdaılarǵa jatpaıdy. Bul ujymdyq ımmýnıtetti damytýǵa múmkindik beredi, ádettegi ómir saltyna oralýǵa kómektesedi. Elordanyń barlyq turǵyny qaladaǵy jáne jalpy Qazaqstan Respýblıkasyndaǵy KVI jaǵdaıynyń aýyrlyǵyn sezinýi tıis.
Men árbir turǵyndy qamqorlyq tanytyp jáne oraza ustaǵan týystaryn COVID-19 juqtyrýdan qorǵaýdy suraımyn, ol úshin bárine belgili saqtyq sharalaryn saqtaý kerek, atap aıtqanda: qoǵamdyq oryndarda maska taǵý, áleýmettik qashyqtyqty saqtaý, buqaralyq is-sharalardy uıymdastyrmaý jáne qatyspaý», - dedi elordanyń bas memlekettik sanıtarlyq dárigeri.
Aıta keteıik, elordada epıdemıologııalyq jaǵdaı áli de qubylmaly, qalada kúnine 350-den 650-ge deıin jaǵdaı tirkeledi. Elordada halyq kóp jınalatyn oryndarda turǵyndarǵa vaktsına salý pýnktteri ashylady.
