Elordanyń bas sanıtar dárigeri turǵyndarǵa úndeý jasady

NUR-SULTAN. QazAqparat – Nur-Sultan qalasynyń bas memlekettik sanıtar dárigeri Sarhat Beısenova epıdemııalyq ahýaldyń nasharlaýyna baılanysty elorda turǵyndaryna úndeý jasady, dep habarlaıdy QazAqparat tilshisi.

«Qurmetti elorda qonaqtary men turǵyndary! Qazir koronavırýstyń taralýyna baılanysty karantın sharalarynyń kúsheıtilýine qaramastan, keı turǵyndar qaýipsizdik sharalaryn saqtamaı, adam ómirine qaýip tóngen jaǵdaılar jıilep ketti. Sondyqtan sizden karantın sharalaryn saqtaýdy suraımyz. Betperde taǵyp, qolyńyzdy muqııat jýý kerek. Sanıtaızerdi ózińizben birge alyp júrińiz, onymen qolyńyzdy únemi zalalsyzdandyrý kerek. Meılinshe adam kóp jınalatyn jerlerge barmańyzdar. Sondaı-aq, túrli merekeler ótkizýdi de toqtata turý kerek. Ózińizge jáne jaqyndaryńyzǵa qorǵanysh bolyńyz», - dedi S. Beısenova elorda ákimdiginde ótken onlaın brıfıngide.

Buǵan deıin Sarhat Beısenova elordadaǵy KVI juqtyrý statıstıkasyn jarııalaǵan edi. Elordada koronavırýs juqtyrǵandar kúnine 150-den 280-ge deıin tirkeledi.

Aıta keteıik, elordada qashyqtan oqıtyndar arasynda KVI juqtyrý jaǵdaıy kóbeıgen.

Oqý jylynyń basynan 25-shi naýryzǵa deıingi COVІD-19 jaǵdaıy boıynsha oqýshylar arasynda 1590 jaǵdaı tirkeldi. Onyń ishinde offlaın rejımde oqýshylar arasynda 30,6% (1103 jaǵdaı), qashyqtan oqıtyndar arasynda – 69,4%. Oqý jylynyń basynan beri Nur-Sultan qalasy boıynsha 92 mektep karantınge jabylǵan.

Sonymen birge, S. Beısenova qandaı jaǵdaıda karantın talaptary kúsheıtiletinin túsindirdi.