Elordanyń bas alańynda Almaty oblysynyń aýyl sharýashylyǵy jármeńkesi ótýde (FOTOREPORTAJ)
ASTANA. QazAqparat - Elordanyń ortalyq alańynda Almaty oblysynyń aýyl sharýashylyǵy jármeńkesi ótýde. Jármeńkeni Astana qalasynyń ákimi Imanǵalı Tasmaǵambetov pen Almaty oblysynyń ákimi Amandyq Batalov aralap shyǵyp, buqaralyq aqparat quraldary ókilderine suhbat berdi.
«Búgin Astanada qalyptastyrǵan dástúr boıynsha kúzde ótetin jármeńkeler bastaldy. Osy jaqsy dástúrdi bıyl Almaty oblysy bastap otyr. Eldiń kóńili jarqyn. Óıtkeni, osynaý bir jármeńkeni jyl saıyn elorda jurtshylyǵy kútedi. Sebebi, aýyl sharýashylyǵy eńbekkerleri jaz boıy mańdaı terin tókken eńbegin ákep, ony elordaǵa pash etedi», - dedi I.Tasmaǵambetov.
Qala basshysynyń sózine qaraǵanda, Almaty oblysy osy jármeńkege 450 tonna azyq-túlik ákelgen. Ónimderdiń quny elorda bazarlaryndaǵy baǵasymen salystyrǵanda 20 paıyzǵa deıin, keıbiri ónimder tipti 50 paıyzǵa deıin tómen saýdalanýda.
«Árıne, mundaı dástúr jalǵasyn tabady. Kelesi senbi kúni Jambyl oblysy kelmekshi. Oslaısha, árbir senbide qalanyń ortalyq alańynda merekeli, berekeli jármeńkeler uıymdastyrylatyn bolady», - dedi ol.
Aıta keteıik, Jetisý óńiri elordaǵa 50-den astam ónim túrin ákelgen. Onyń ishinde 15 tonna qoı eti, 16 tonna sıyr eti, 14 tonna jylqy eti, 6 tonna qus eti, 12 tonna balyq, 18,2 tonna sút ónimderi, 52 tonna kartop, 194 tonna kókónis syndy ónimder bar.
