Elordanyń balalar psıhologtary daryndy tárbıelenýshilermen jumys isteýdi úırenýde
ASTANA. 17 sáýir. QazAqparat - Búgin elordada «Zııatkerlik qabilet túrleri: daryndy balalardyń emotsıonaldyq oı-óristerin damytý» taqyrybynda eki kúndik respýblıkalyq semınar bastaldy. Oǵan Astana qalasynyń bilim mekemelerinen 100-den astam psıholog pen pedagog qatysýda. Bul týraly astana.kz saıtyna «Astana-daryny» respýblıkalyq ǵylymı-tájirbıelik ortalyǵynan málim etti.
Semınarǵa elorda mektepterinen 70 jáne balabaqsha men qalanyń arnaýly orta oqý oryndarynan 30-ǵa tarta psıholog qatysýda.
Ortalyqtyń málimeti boıynsha, semınardyń ótkizilý maqsaty - daryndy balalardyń oı-órisin damytýda psıhologııalyq qyzmettiń tıimdiligin kóterip, mektep psıhologtarynyń kásiptik deńgeılerin arttyrý bolyp tabylady.
«UBT jaqyndap keledi. Semınar barysynda qatysýshylarǵa oqýshylardy qorytyndy testileýge qalaı daıyndaý kerektigi aıtylady. Biz Qazaqstanǵa tanymal psıhologtar men muǵalimderdi shaqyrdyq. Olar lektsııa, tájirıbelik sabaqtar men trenıngter ótkizedi. Olardyń qatarynda Ál-Farabı atyndaǵy QazMÝ-diń dotsenti, psıhologııa ǵylymdarynyń kandıdaty Maıra Qunanbaeva men L.N.Gýmılev atyndaǵy EUÝ professory A. Tynyshpaeva bar», - dedi astana.kz saıtyna «Astana-daryny» RǴTO dırektory Maıra Qurmanbaeva.
Onyń aıtýynsha, semınar №50 mektep bazasynda ótýde. Qorytyndysynda barlyq qatysýshylarǵa respýblıkalyq dárejedegi sertıfıkattar beriletin bolady.
