Elordanyń balabaqshalaryna tekserý júrgizilýde
ASTANA. QazAqparat - Elordanyń balabaqshalary qyzmetine qalalyq Bilim basqarmasynyń komıssııasy tekserý júrgizýde, dep habarlaıdy QazAqparat.
Basqarma aqparatyna qaraǵanda, 2017 jylǵy 31 qańtar kúni keshke áleýmettik jelilerdi paıdalanýshy Janna Shapenova astanalyq bilim berý qyzmetkerlerine óziniń buıymtaıyn bildirgen. Onda №77 «Qoshaqan» memlekettik balabaqshasynyń synǵan oryndyqtarynyń, bir kileminiń jáne jıegi joq ýnıtazdyń sýretteri júktelgen.
«Balalar mynadaı oryndyqtarda jáne jıegi joq sýyq ýnıtazda otyrýǵa májbúr. Onyń saldaryn túsiný úshin bul ýnıtazǵa balabaqsha meńgerýshisin otyrǵyzý qajet. Balalar oıyn barysynda nemen shuǵyldanatyn bilmeıdi. Sebebi olarda oıynshyq joq, kilemderdi qysqartqany sonshalyqty, oǵan balalar syımaıdy (topta 30 baladan astam). Sondyqtan olar jerde oınaıdy. Tárbıeshiler jıi aýysady (tárbıeshilerdiń aıtýynsha, olarǵa meńgerýshi tarapynan psıhologııalyq jáne moraldyq qysym jasalady). Bul óz kezeginde balalardyń psıhıkasyna áser etedi. Ata-analar birneshe márte meńgerýshimen sóılesti, biraq másele sol kúıi qalyp otyr. Onyń is-áreketin bireý baqylaýy qajet. Álde ol balabaqshada ózindik bılikti júrgizýdi jalǵastyra ma? Ondaǵy ahýal balalar úshin jasalmaǵan. Shara qoldanýlaryńyzdy ótinemin!», - dep jazǵan edi Astana turǵyny.
Osydan keıin Astana qalasy ákiminiń tapsyrmasymen 2017 jylǵy 1 aqpanda balabaqshanyń qyzmetin tolyq tekserý maqsatynda arnaıy komıssııa quryldy.
«Áleýmettik jelilerdegi sýretter 2016 jyldyń 23 jeltoqsanynda «Qulynshaq» tobynda túsirilgen. Barlyq toptar tekserilip, sanıtarlyq toraptardyń jaǵdaıy, oıynshyqtardyń, kilemderdiń bolýy muqııat qaraldy. Barlyq jerde kilemder tóselgen. Meńgerýshiniń sózinshe, jeltoqsan aıynda vırýsty ınfektsııanyń saldarynan ylǵaldy tazalaý jumystaryn júrgizý úshin keıbir kilemder alynyp tastalǵan. Sanıtarlyq toraptardyń jaǵdaıyna toqtalsaq, keıbir ýnıtazda bekitilgen jıekter bolmaǵany anyqtaldy», - delingen basqarma aqparatynda.
«1 aqpan kúni saǵat 18:00-ge deıin barlyq eskertýler joıyldy. Búgin 2 aqpan kúni atalmysh balabaqshada komıssııa jumysynyń nátıjeleri boıynsha jalpy ata-analar jınalysy ótedi. Balabaqshanyń qyzmetkerleri úshin bólek jınalys uıymdastyrylady», - dep atap ótken Astana qalalyq bilim basqarmasynyń basshysy Senǵazyev Qasymhan Senǵazyuly.
Aıta keterligi, 2016 jyldyń qazan aıynan beri Astanada senim telefondary qyzmet etedi.
Osyǵan oraı basqarma eger siz nemese sizdiń balalaryńyz Astana qalasynyń bilim berý uıymdarynda ákimshiliktiń nemese oqýshylardyń tarapynan zańǵa qaıshy áreketterge (mekteptiń qajettiligine aqsha jınaý, balany mektepte qatarlastarynyń uryp-soǵýy, mektep aýmaǵynda temeki ónimderin jáne t.b. satý) tap bolsańyz, mundaı jaǵdaılardy nazarsyz qaldyrmaýdy suraıdy.
«8-701-588-99-66 nómirine SMS-habarlama joldańyz (mátinde mindetti túrde mekteptiń nómirin kórsetý qajet. Máselen, eger № 98 mektep bolsa, onda habarlamany «098» dep bastaý qajet. SMS-habarlama júıesi tek mektepter úshin qoljetimdi). Shaǵymdardyń kez kelgen faktileri (balabaqsha, mektep, kolledj) boıynsha ony jan-jaqty sıpattap (eskertpe), 8-778-255-01-62 nómirine WhatsApp habarlama jiberińiz. Shaǵymdardyń kez kelgen faktileri (balabaqsha, mektep, kolledj) boıynsha Astana qalalyq bilim basqarmasynyń «jedel jeli» telefondaryna habarlasyńyz: 55-01-62, 8-778-255-01-62. Jumys ýaqyty s 9:00 do 19:00, túski úzilis 13:00-14:30», - deıdi basqarmadan.
