Elordanyń baǵdarshammen retteletin barlyq jol aıryqtarynda júrginshi jolyn bildiretin belgiler jasalady

Bul týraly búgin osyndaı baǵdarsham túbindegi jol belgisimen tanystyrǵan Astana qalalyq ІІD Jol polıtsııasy basqarmasy jol baqylaý bóliminiń bastyǵy, polıtsııa podpolkovnıgi Nurlan Ývaev málim etti.

Onyń atap ótýinshe, elimizde alǵash ret engizilip otyrǵan jańalyq retteletin jol qıylystarynan ótý barysynda júrginshi aǵynynyń qozǵalysyn bir tártipke keltirýge múmkindik berip, kúndiz jáne túngi ýaqyttarda qıylystardyń der kezinde kórinýin qamtamasyz etedi. «Bul júrgishilerdiń qatysýymen oryn alatyn jol-kólik oqıǵalarynyń birshama tómendeýine múmkindik beredi», deıdi ol.

N.Ývaevtiń málimetterine qaraǵanda, jyl basynan beri elordada 100 jol-kólik oqıǵasy tirkelip, olardyń saldarynan 13 adam kóz jumsa, 98 adam jaraqattanǵan. Onyń ishinde 61 oqıǵa júrginshilerdiń qatysýymen oryn alǵan. Sondaı-aq sońǵy tórt aıdyń ishinde júrginshi joldarynda jáne kóshe qıylystarynda 23 jol-kólik oqıǵasy tirkelgen.

«Jol qozǵalysy qaýipsizdigin jaqsartý, sonymen qatar júrginshilerdiń qatysýymen oryn alatyn oqıǵalardyń aldyn alý ári tómendetý maqsatynda qozǵalys baǵdarshammen retteletin qıylystarda júrginshi ótetin rettelmeıtin jol ekendigin bildiretin «Zebra» jol belgisin belgileýge sheshim qabyldadyq», deıdi ol.

Qazirgi ýaqytta bundaı belgiler qalanyń Kenesary-Áýezov, Kenesary-Bókeıhan, Kenesary-Jeltoqsan kósheleriniń qıylystarynda jasaldy.