Elordanyń avtoparkterine 2 mlrd teńge sýbsıdııa berilmek
NUR-SULTAN. QazAqparat – Elordadaǵy avtobýs parkterine 2 mlrd teńge sýbsııadııa beriledi. Bul týraly Nur-Sultan qalasynyń ákimi Altaı Kólginov aıtty, dep habarlaıdy QazAqparat tilshisi.
Qala basshysy, avtobýs parkterin sýbsıdııalaý júıesi jol júrý qunyn turaqty ustap turý úshin qajet ekenin aıtady.
«Qoǵamdyq kólik – óte sezimtal kólik túri. Sondyqtan bul salany sýbsıdııalaý jalǵasady. Osy salany qoldamasaq, qarapaıym halyqtyń qaltasyna bılet baǵasy boıynsha salmaq túsedi. Sondyqtan sýbsıdııany toqtatpaımyz. Tıisti sýbsıdııanyń bári kezeń-kezeńmen tólenedi», - dedi ákim BAQ ókilderiniń saýalyna jaýap berý kezinde.
Altaı Kólginovtiń aıtýynsha, atalǵan baǵytta bıýdjetten 2 mlrd teńge bólinbek.
«Bıýdjet áli jabylǵan joq. Sondyqtan, ótken jylǵy sýbsıdııa bári bir tólenedi. Jaqyn ýaqytta shamamen 2 mlrd teńge sýbsıdııany salamyz. Bizge eń áýeli qoǵamdyq kólik qyzmetiniń sapasy jaqsy, jolaýshylarǵa yńǵaıly bolǵany kerek», - dedi ákim.
