Elordanyń aýlalarynda fýtboldan tegin sabaqtar ótkiziledi
ASTANA. QazAqparat - Elordada tórt turǵyn úıdiń aýlasynda balalarǵa arnalǵan fýtbol sektsııasy ashyldy. Jattyǵýlar aptasyna úsh ret - dúısenbi, sársenbi jáne juma kúnderi ótedi. Qazirgi kezde 8 jastan asqan 60 bala tegin jattyǵyp júr.
Fýtbol lageri «Esil» aýdanynda Saýran k-si, 5a, Saraıshyq k-si, 34, sondaı-aq, «Almaty» aýdanynda Abylaı han dańǵyly, 49/3, Jubanov k-si, 10 meken jaılary boıynsha jumys isteıdi. Bastalýy saǵat 15.00. Jattyqtyrýshylar - Erbol Musabaev jáne Pavel Halezov.
«Menińshe balalarǵa jattyqtyrýshylarmen daıyndalǵan qyzyq bolady. Olarǵa ár túrli jattyǵýlar jasatamyz. Bul jartylaı kásibı deńgeı. Biz balalardy baqylaımyz, deńgeıi joǵary jáne qabilettiligi bar balalar qalalyq fýtbol ortalyǵyna, Balalar men jasóspirimder sport mektebine jiberiledi», - deıdi Pavel Halezov.
Qazaqstannyń fýtbol federatsııasy jas sportshylardy kerek-jaraqtarmen qamtamasyz etedi, dep habarlaıdy elorda ákimdiginiń resmı saıty.
Aıta keteıik, jyl sońyna deıin taǵy da 10 aýlada fýtboldan tegin sabaqtar ótkizý josparlanǵan.
