Elordanyń áýe aılaǵy álemniń erekshe áýejaılary tizimine endi

Atalǵan tizimdi jasaýshylardyń nazaryn Astana halyqaralyq áýejaıy jolaýshylar termınalynyń túngi ýaqytta jarqyrap alystan kóz tartatyn kúmbezi erekshe aýdarǵan kórinedi. Aıta keterligi, Astana áýejaıynyń irgetasy 1930 jyldary qalanǵan bolatyn. Degenmen el ordasy Almatydan Astanaǵa aýysqannan keıin jolaýshylar leginiń artýyna baılanysty áýejaı qarqyndy damı bastady. Jalpy, qalanyń bas josparyna sáıkes, 2020 jylǵa qaraı jolaýshylar leginiń artýyna baılanysty kúnine 1200 adamdy qabyldap, jylyna 7 mln. adamǵa qyzmet kórsetýge múmkindigi jetetin taǵy 1 áýejaı salý josparlanǵan.

Reseılik blogerlerdiń tiziminde munan bólek Grýzııadaǵy Tamara hanshaıym áýejaıy kirip otyr. Nemistiń Mayer H. Architects sáýlet kompanııasynyń negizinde salynǵan bul áýe aılaǵy kúnine birneshe ǵana shaǵyn ushaqty qabyldaı alady. Al áýejaı ǵımaraty orta ǵasyrlardaǵy sharýashylyqpen qatar qorǵanys qyzmetin qosa atqarǵan eń tanymal svan munaralaryna uqsaıdy.

Erevannyń Zvartnots áýejaıy da osy tizimnen oryn alǵan. Áýejaı Armenııa astanasynan 12 shaqyrym jerdegi alańqaıǵa qonǵan alyp ushatyn tarelkaǵa uqsaıdy. Degenmen 1980 jyly paıdalanýǵa berilgen bul áýejaı aıtarlyqtaı eskirip otyr. Sondyqtan da argentınalyq Corporation America kompanııasy ony súrip tastap, ornyna basqa zamanaýı termınal salýdy josparlaýda.

Bulardan bólek tizimge Bakýdegi G.Álıev atyndaǵy áýejaı, Tallın, Belgorod, Sankt-Peterbor áýejaılary kirip otyr.