Elordanyń árbir úshinshi turǵyny kásipker

ASTANA. QazAqparat – Astana – bul kásipkerler men ınvestorlardyń qalasy. Bul týraly elorda ákiminiń orynbasary Erlan Bekmyrzaev aıtty, dep habarlaıdy QazAqparat tilshisi.

«Respýblıkalyq ekonomıkalyq áleýetinde Astana qalasynyń róli erekshe. Qalada árbir úshinshi turǵyn kásipkerlikpen aınalysady. Osy jyldyń jeltoqsan aıynyń basyndaǵy málimetterge sáıkes, shaǵyn jáne orta bıznestiń 201 sýbektisi jumys istep tur. Olarda 444 myńnan astam adam jumys isteıdi. Bul ekonomıkalyq belsendi qala turǵyndarynyń 71 paıyzyn quraıdy. Eger burynyraq elorda memlekettik qyzmetshilerdiń qalasy bolsa, al búgingi Astana – bul kásipkerler men ınvestorlardyń qalasy», - dedi ol ákimdiktiń baspasóz qyzmeti alańynda ótken brıfıngte.

Onyń aıtýynsha, elorda qalany damytýǵa, jańa jumys oryndaryn ashýǵa jáne zamanaýı ınfraqurylym salýǵa qarjy quıatyn ınvestorlar úshin ashyq. Bul rette Astana úshin joǵary tehnologııaly jáne ınnovatsııalyq ónerkásip óndirisin damytý, kólik-logıstıkalyq keshendi keńeıtý, áleýmettik saladaǵy jobalardy júzege asyrý basymdyqqa ıe baǵyt sanalady.

«Astana – eldiń ınvestıtsııalyq qaqpasy, ınvestıtsııa men ınvestorlar úshin ózindik magnıt. Biz kapıtal aǵynyn qamtamasyz etý úshin qolaıly jaǵdaı jasaý baǵytynda belsendi ári josparly jumys istep jatyrmyz», - dedi Erlan Bekmyrzaev.