Elordanyń 82 mektebi aǵymdaǵy oqý jylynda shákirtterdi qabyldaýǵa daıyn

Bul týraly búgin «Mektepke jol» atty dástúrli sharanyń bastalýyna oraı uıymdastyrylǵan baspasóz máslıhaty barysynda Astana qalalyq bilim basqarmasynyń bastyǵy Ásıma Bımendına aıtty.

«Astanada balalardyń tegin orta bilim alý konstıtýtsııalyq quqyǵyn júzege asyrýǵa jaǵdaı jasalǵan. Qazirgi ýaqytta qalada 68 memlekettik, 13 jeke jáne 1 keshki mektep jumys isteıdi, ıaǵnı 82 bilim oshaǵy jańa oqý jylynda oqýshylardy qabyldaýǵa daıyn», - dedi ol.

Onyń atap ótýinshe, ótken oqý jylynyń sońynda jalpy bilim berý mektepteriniń oqýshylar sany 73 416 adamǵa jetken. Olardyń 71 039-y melekettik, al 2377-si jeke menshik mektepterde bilim alýda.

«Aǵymdaǵy jyly biz sol jaǵalaýda ornalasqan № 66 jáne Tilendıev kóshesiniń boıyndaǵy № 67 mektepterdi paıdalanýǵa berdik. Sonymen qatar 1 qyrkúıekte Kóktal-2 aýylyndaǵy mektep ashylady», - dedi Á.Bımendına.