Elordanyń 70 polıtseıi «Halyq alǵysy» medalimen marapattaldy
NUR-SULTAN. QazAqparat – Búgin Nur-Sultan qalalyq polıtsııa departamentinde tótenshe jaǵdaı rejımi kezeńinde koronavırýspen kúrestiń aldyńǵy shebinde bolyp, erlik kórsetken 70 polıtsııa qyzmetkeri QR Prezıdenti Jarlyǵymen bekitilgen «Halyq alǵysy» medalimen marapattaldy, dep habarlaıdy QazAqparat tilshisi.
Erekshe kózge túsken polıtsııa qyzmetkerlerine medaldi departament basshysy, general-maıor Erjan Sádenov saltanatty jaǵdaıda tapsyrdy.
«Memleket basshysy sizderdiń indettiń aýyr kúnderine kórsetken eren eńbekterińizdi erekshe baǵalap otyr. Oǵan osynaý «Halyq alǵysy» medali dálel bola alady. Sizder ınfektsııanyń taralýyna jol bermeýge belsendi járdem kórsetip, vırýspen kúrestiń aldyńǵy shebinde turdyńyz», - dedi departament basshysy.
Elimiz úshin osynaý qıyn ýaqytta polıtsııa qyzmetkerleri táýlik boıy rejımde jumys istep, blokpostar men jedel shtabta qyzmet atqardy. Olar medıtsına qyzmetkerlerimen birge elordadaǵy tótenshe jaǵjdaı rejımin qamtamasyz etip, turǵyndar kómek kórsetti.
Tótenshe jaǵdaı rejımi kezinde kóptegen astanalyqtar jáne elordaǵa taıaý ornalasqan aýdandardyń turǵyndary qıyn jaǵdaıǵa tap boldy. Olarǵa kómekke qatardaǵy polıtsııa qyzmetkerleri kelip, qıyn jaǵdaıdan shyǵý jolyn birge izdedi. Olardyń qatarynda ýchaskelik polıtsııa ınspektory Nurjan Áshirbekov, Ádilet Dúzbaev, Abaı Syzdyqov, Samat Tórahmetov, arnaýly batalon ınspektory Nurdáýlet Myńjasarov, Patrýldik polıtsııa polkiniń qyzmet ıspektory Berikbol Kóksegen syndy azamattar bar.
Elorda polıtseıleri indet kezeńinde ǵana emes kúndelikti qyzmetterinde batyldyq pen erliktiń jarqyn úlgisin kórsetip júr. Máselen, Patrýldik polıtsııa polkiniń qyzmet ıspektory Berikbol Kóksegen 2013 jyldan beri qyzmeti barysynda talaı ret erlikke para-par áreketke bardy. Atap aıtqanda, osy jyldyń qyrkúıeginde kópirden sekirmek bolǵan qyzdy qutqaryp qaldy. Al «Oqjetpes» blokpostynda kezekshilik etken kezinde jedel em alýdy qajet etken naýqasty shuǵyl túrde aýrýhanaǵa jetkizdi. Taıaýda ǵana júkti áıeldi aldap, uıaly telefonyn alyp ketken alaıaqty qolǵa túsirdi.
