Elordanyń 17 jyldyǵyna oraı qalany bezendirý úshin alǵash ret kún energııasy paıdalanyldy (FOTO)
ASTANA. QazAqparat - Elordanyń 17 jyldyǵyna oraı qalany bezendirý úshin alǵash ret kún energııasy paıdalanyldy. Jalpy qalany merekelik bezendirý kezinde 30-ǵa jýyq shaǵyn arhıtektýralyq pishinder paıdalanyldy. Jaryq-dıodty ınstallıatsııalar elordanyń 3 aýdanyna bólindi.
Bul týraly Astana ákimdiginiń resmı saıty habarlady.
«ADVART» JShS atqarýshy dırktory Janar Ábishevanyń aıtýynsha, komanda tujyrymdamany daıyndaýǵa 3 apta, al, konstrýktsııalardy ornatýǵa bir aıdan astam ýaqyt jumsaǵan.
«Ár tarmaq boıynsha jeke top jumys istedi. Jalpy bezendirýdi uıymdastyrýǵa 150 adam tartyldy», - dedi Janar Ábisheva.
Mereke kúnderi Astanaǵa 23 memleket pen Qazaqstannyń óńirlerinen 2000-nan astam qonaq kelgen. Uıymdastyrýshylar men qala ákimdigi jyl saıyn merekeni qala turǵyndary men qonaqtaryna qoljetimdi etýge tyrysady. Qalalyq bıliktiń basty maqsaty - árbir adam qatysa alatyn sharalardy barynsha kóp ótkizý.
Bıyl «Jan júregim Astana» konstrýktsııasy úsh tilde 20 jerde ornatyldy.
Janar Ábishevanyń aıtýynsha, jumysta paıdalanylǵan barlyq materıaldar eń sońǵy úlgidegi energııa únemdeıtin tehnologııalardy qoldaný arqyly jasaldy. Qalalyq elektr jelileri resýrstaryn únemdeý úshin alǵash ret kún energııasyn shoǵyrlaıtyn batareıalar, sondaı-aq, RGB tehnologııalar qoldanyldy.
Nurly jol býlvary men «Báıterek» monýmenti aldyndaǵy alańda qoıylǵan oryndyqtary bar gúl arkalar jurttyń erekshe nazaryna ilikti. Jalpy, osyndaı 40 arka ornatyldy.
Sonymen qatar, bezendirý barysynda «EHRO» kórmesiniń sımvoly da paıdalanyldy.
Kóptegen sharalardy eskere kele, Esil ózeniniń jaǵalaýyna erekshe kóńil bólindi.
«Ózen jaǵasynda adam kóp júredi. Jaǵalaýda Astana kúni sımvolymen bannerler ilindi, ózende túnde janatyn «Qaıyq» kompozıtsııalary ornatyldy», - dedi Janar Ábisheva.
«Jastar» teatry alańynda tuńǵysh ret dızaınerlik jıhaz elementteri qoıyldy.
