Elordanyń 15 jyldyǵyna oraı «Astana - arman qala» kórmesi ashylady
ASTANA. 20 maýsym. QazAqparat - Qazaqstan Respýblıkasynyń Tuńǵysh Prezıdenti murajaıy Astana qalasynyń 15 jyldyǵyna arnalǵan birqatar is-sharalar legin ázirledi.
26 maýsymda tanymal astanalyq fotograf Vladımır Kýrılovtyń «Astana - arman qala» atty jeke kórmesi ashylady. Bul seriktestik jobalar aıasynda uıymdastyrylǵan murajaıdaǵy Astana kúnine arnalǵan is-sharalardyń bastamasy bolýda, dep habarlady Astana qalasynyń resmı saıty.
«Vladımır Kýrılov bizdiń bas qalanyń jylnamashysy retinde keńinen tanymal. Qazaqstannyń jas astanasyna arnalǵan onyń kóptegen fotosıýjetteri óziniń qaıtalanbas órnekteri men tyń kózqarasymen erekshelenedi», - dep atap ótti murajaıdyń baspasóz qyzmetinen.
V.Kýrılov 1956 jyly 25 maýsymda Aqmola (Astana) qalasynda dúnıege kelgen. Onyń barlyq eńbek joly, ósý, órkendeý belesteri osy qalamen tyǵyz baılanysty. Avtordyń fotosýretteri halyq júregine uıalaǵan arman qalanyń qalyptasý tarıhyn kóz aldyńyzǵa alyp keledi.
Kórmege Vladımır Kýrılovtyń 30-dan astam eńbegi qoıylady.
Onyń fotosýretteri qalanyń barlyq qonaqjaı oryndary men kózdiń jaýyn alatyn kórikti jerlerin, atap aıtqanda: «Aqorda», «Báıterek», Beıbitshilik pen kelisim saraıy, «Haziret Sultan» meshiti, «Han Shatyr» SOSO, taǵy da basqa sáýlet ónerin ózindik mánerimen, ózindik talǵammen usynýymen baǵaly.
Ásirese, elordanyń keremet kelbetin úlken bıikterden túsirý tek Vladımır Kýrılovke ǵana tán. Osy sýretterdi halyqqa usyný úshin ol erinbeı-jalyqpaı kez kelgen bıiktiktiń ushar basyna shyǵyp, shyǵarmashylyq izdenispen júredi.
«Kez kelgen dúnıeni berile, súısine isteseń, ol óz jemisin kórsetedi. Men de óz eńbegimniń nátıjesin kórýdemin», - deıdi avtor.
