Elordanyń 1 trln teńgeden astam bıýdjeti qaıda jumsalady
Naqty túsimder taldaýyna sáıkes, jeke kirister boıynsha jospardy 71,5 mlrd teńgege deıin ulǵaıtý usynylyp otyr. Onyń ishinde salyqtyq túsimder boıynsha 60 mlrd teńgege, salyqtyq emes túsimder boıynsha 9,5 mlrd teńgege arttyrý usynyldy.
«Shyǵystarǵa kelsek, birinshiden memlekettiń áleýmettik mindettemelerin oryndaýdyń basymdylyǵyn negizge ala otyryp, áleýmettik salany qarjylandyrý máseleleri erekshe tártippen qaralady. Máselen, áleýmettik salaǵa shamamen 17,4 mlrd teńge baǵyttalǵan. Bul medıtsınalyq áleýmettik mekemelerde qarttar men múgedektigi bar jandar úshin arnaýly áleýmettik qyzmetter kórsetýge, jeke kómekshi qyzmetterine aqy tóleýge, múgedek balalardy tasymaldaýǵa arnalǵan ınvotaksı sanynyń ulǵaıýyna baılanysty. Densaýlyq saqtaý salasynda – tumaýǵa jáne A gepatıtine qarsy vaktsınalardy satyp alýǵa, qalalyq emhanalardy kúrdeli jóndeýge, tegin medıtsınalyq kómektiń kepildik berilgen kólemin qamtamasyz etýge, bilim berý salasynda – oqý protsesine sáıkes, kitaptardy jyl saıyn jańartýǵa, jańa oryndarǵa balabaqshalardy jan basyna qarjylandyrýǵa, kolledjderdi jaraqtandyrýǵa jáne balabaqshalardaǵy týrnıketterdi jaraqtandyrýǵa baılanysty», - dep túsindirdi Qaısar Manqaraev búgingi máslıhat otyrysynda.
Ekinshiden, qarajattyń edáýir kólemi tynys-tirshilikti qamtamasyz etý ınfraqurylymyn nyǵaıtýǵa, jol-kólik jelisin ustaýǵa jáne damytýǵa baǵyttalady. Qala kósheleriniń qurylysyn bastaý jáne jalǵastyrý, ortasha jóndeý, qoǵamdyq kólik tasymaldaýshylarynyń shyǵyndaryn sýbsıdııalaý, baǵdarsham obektileriniń qurylysyn jalǵastyrý, nóser kárizin kútip-ustaý, tazartý, kommýnaldyq turǵyn úı qorynyń turǵyn úı jobalaý men salý, rnekonstrýktsııalaý, qalany kógaldandyrý men abattandyrý jumystary jalǵasady.
Sondaı-aq, jańadan qurylǵan Nura aýdany ákimi apparaty qyzmetin qamtamasyz etýge qarajat qarastyrylǵan.
«Úshinshiden, qarjylandyrý qalany damytý úshin qajetti jekelegen is-sharalarǵa da kózdelgen. Qalalyq monıtorıng jáne jedel den qoıý ortalyǵy qyzmetkerlerine eńbekaqy tóleýge, ınnovatsııalyq qyzmetti damytýdy qamtamasyz etý jónindegi qyzmetterge arnaıy tehnıka satyp alýǵa, jer ýchaskelerin satyp alýǵa, 16 kóppáterli turǵyn úı kesheninde kúrdeli jóndeý ótkizýge, 5 kóppáterli TK 10 lıftin aýystyrýǵa qarjy baǵyttalǵan. Osylaısha, engizilgen ózgeristerdi eskere otyryp, Astana qalasynyń 2023 jylǵa arnalǵan túzetilgen jáne naqtylanǵan bıýdjetiniń jalpy kólemi 1 trln 120 mlrd 955 mln teńge bolady. Onyń ishinde jeke kirister boıynsha túsimder 635 mlrd 242 mln teńgege teń», - dedi Q. Manqaraev.
