Elordanyń № 1 mektep-lıtseıinde aýǵan soǵysynda qaza bolǵan jaýyngerlerge eskertkish taqta ashylady
ASTANA. Qańtardyń 21-i. QazAqparat - Qańtardyń 22-sinde elordadaǵy №1 mektep-lıtseıde Aýǵanstanda qaza bolǵan ınternatsıonalıst-jaýyngerlerge eskertkish taqta ashylady.
Bul saltanatty is-shara Aýǵanstannan keńes áskerleriniń shyǵarylǵanyna 21 jyl tolýyna jáne Uly Otan soǵysyndaǵy jeńistiń 65 jyldyǵyna arnalǵan. Bul aqparatty Astana qalalyq bilim basqarmasynyń baspasóz qyzmeti taratyp otyr.
«№ 1 mektep-lıtseı ǵımaratynda eskertkish taqta ornatý kezdeısoq emes. Atalǵan oqý ornynyń eki túlegi Aleksandr Korobeınıkov pen Rýdolf Moos aýǵan soǵysynda erlikpen qaza tapty», delingen baspasóz habarlamasynda.
Ashylý saltanatyna qala ákiminiń orynbasary Ámirhan Rahymjanov, qalalyq Máslıhat hatshysy Vladımır Redkokashın, Saryarqa aýdanynyń ákimi Sábıla Mustafına, QR Qorǵanys mınıstrligi Bas áskerı ınspektsııasynyń bastyǵy, Halyq qaharmany, general-leıtenant Baqytjan Ertaev, Aýǵanstandaǵy soǵys múgedekteri men ardagerler odaǵynyń tóraǵasy Qaırat Elýbaev jáne aýǵan soǵysynyń ardagerleri qatysady.
Eskertkish taqta Aýǵanstan soǵysy ardagerleriniń óz qarajattaryna daıyndalǵan.
Atalǵan is-shara Astana qalasynyń «Aýǵan soǵysy múgedekteri men ardagerleri odaǵy» qoǵamdyq birlestigimen birlesip ótkiziledi. Qazirgi tańda elordada 896 aýǵan soǵysy jaýyngerleri tirkelgen.
