Elordany zalalsyzdandyrýǵa kún saıyn 450 myń adam jumyldyrylady - Baqtııar Máken
NUR-SULTAN. QazAqparat - Elordaǵa 300 myń maska jetkizildi. Bul týraly Ortalyq kommýnıkatsııalar qyzmetindegi brıfıngte Nur-Sultan qalasy ákiminiń orynbasary Baqtııar Máken aıtty, dep habarlaıdy QazAqparat tilshisi.
«Koronavırýs ınfektsııasynyń taralýyn boldyrmaý úshin dezınfektsııalaý boıynsha aýqymdy jumystar júrgizilip jatyr. Adam kóp jınalatyn jerlerge erekshe kóńil bólinedi. Áleýmettik nysandar, bazarlar, sýpermarketter, trotýarlar, balalarǵa arnalǵan oıyn alańdary, kireberister men taǵy da basqa tıisti jerler dezınfektsııadan ótip jatyr», - dedi qala ákiminiń orynbasary.
Onyń atap ótýinshe, qala aýmaǵyn eritindimen óńdeýge kúndelikti 450 adam qatysady. Dezınfektsııalaý is-sharalaryn ótkizýge qalalyq qyzmetterden basqa qarýly kúshterdiń bıologııalyq qorǵaý bólimshesiniń áskerı qyzmetshileri de jumyldyrylǵan.
«Tegin medıtsınalyq kómektiń kepildi kólemi aıasynda dıspanserlik esepke alynǵan onkologııalyq aýrýǵa shaldyqqan naýqastar, júkti áıelder, jasy 65-ten asqan azamattar maskamen qamtylýda. Sonymen qatar, Nur-Sultan qalalyq qoǵamdyq densaýlyq saqtaý basqarmasy medıtsınalyq mekemelerge tirkelgen turǵyndardy maskamen qamtamasyz etý maqsatynda «SK-Farmatsııa» JShS-men birlesip, barlyq medıtsınalyq mekemeler qamtylǵan», - dedi ol.
Baqtııar Mákenniń dereginshe, 22 naýryzdan beri elordaǵa 1 mıllıonnan astam maska dárihanalarda satyldy. Búgin taǵy 300 myń maska jetkizildi. Olardyń bári «Evrofarm» dárihanalar jelisinde satylyp jatyr.
Foto: egemen.kz