Elordany gazdandyrý zııandy shyǵaryndylardy 40 myń tonnaǵa qysqartady – Kólginov

«Ózderińiz de biletindeı, gazdandyrý - bul tarıhı sát, óte mańyzdy joba. Elbasy muny osydan birneshe jyl buryn jarııa etken bolatyn. Endi mine, magıstraldy gaz qubyry salyndy. Prezıdent bul máseleni jeke baqylaýynda ustap otyr. Elordany damytý jónindegi keńeste Memleket basshysy bul jumysty sapaly júrgizýdi tapsyrǵan bolatyn. Ótken jyl kúrdeli boldy. Óıtkeni, sotpen baılanysty aıtys-tartys boldy. Al qazir kesteni qýyp jettik jáne taratý jelileri salynyp jatyr. JES-1 men JES-2-ni jańa jylý berý maýsymynda, kúzde iske qosýǵa tıispiz. Bul baǵytta qazir qarqyndy jumys istep jatyrmyz», - dedi Altaı Kólginov.

Qala basshysynyń aıtýynsha, kestege sáıkes jeke sektorlardyń ishinde eń aldymen Kóktal-1 jáne Kóktal-2 turǵyn úı alabyndaǵy turǵyndarǵa kógildir otyn jetkiziledi.

«Qazirgi ýaqytta aýyldyń ishine kirdik jáne jazda alǵashqy áleýmettik nysandarǵa gaz qosýdy josparlap otyrmyz. Olar: mektepter, qarttar úıi, áleýmettik nysandar. Odan keıin Jeleznodorojnyı eldi mekenine gaz tartylady. Osy rette nelikten jeke sektordan bastaǵymyz kelip otyrǵandyǵyn túsindire keteıin. Birinshi kezekte, bizge ekologııany jaqsartý qajet. Jelsiz aýa raıy kezinde, barlyǵy pesh jaqqanda búkil jeke sektordy tútin basyp ketedi», - dedi elorda ákimi.

Onyń atap ótýinshe, elorda ekologııasyn jylý elektr stansalary, jeke turǵyn úılerde qysta jaǵylatyn otyn jáne avtomobılder buzyp otyr.

«Karantın aýanyń tazara túskendigin kórsetti. Botanıkalyq baqta aqqýlar paıda boldy. Buryn bolǵan emes edi. Mınıstrler úıiniń janynda qoıandar júr. Munyń barlyǵy tabıǵattyń qalaı jandanǵanyn kórsetip otyr. Mine osydan qorytyndy shyǵarýymyz kerek», - dedi ol.

Altaı Kólginovtiń dereginshe, elorda gazdandyrý aýaǵa taralatyn zııandy shyǵaryndylardy 40 myń tonnaǵa qysqartýǵa múmkindik beredi.